އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ ތެރެއިން ބައެއް ފިޔަވަޅުތައް އުވާލަން އެމެރިކާ ތައްޔާރުވަމުން ދާކަމަށް އިސްރްރާއީލުގެ ނޫހެއްކަމަށްވާ "ޔިސްރައެލް ހިޔޮމް" އިން ހާމަކޮށްފިއެވެ.

މި ނޫހުގެ ރިޕޯޓުގައި ބުނެފައިވާ ގޮތުގައި، މިއީ އިސްރާއީލުގެ ވެރިން ވަރަށް ބޮޑަށް ކަންބޮޑުވާނެ ކަމެކެވެ. އެހެންނަމަވެސް، އެމެރިކާގެ ރައީސް ޑޮނަލްޑް ޓްރަމްޕް މިހާރު އީރާނާއި ބެހޭގޮތުން އިސްރާއީލުގެ ބޮޑުވަޒީރު ނަތަންޔާހޫ ދައްކާ ހުރިހާ ވާހަކަތަކެއް ގަބޫލެއް ނުކުރައްވައެވެ. އަދި އެމެރިކާއިން ގަބޫލުކުރާ ގޮތުގައި އީރާނާއި ދެކޮޅަށް ހަނގުރާމައަކަށް ގޮސްގެން ވާނެ ފައިދާއެއް ނެތްކަމަށް ޓްރަމްޕް ދެކެވަޑައިގަންނަވާ ކަމަށްވެސް މި ނޫހުން ބުނެފައިވެއެވެ.

އީރާނުން ނިއުކްލިއާ ހަތިޔާރު ނުއުފައްދާނެކަމުގެ ގެރެންޓީ ދިނުމާއި، ޔޫރޭނިއަމް ފައްކާކުރާ މިންވަރު 3.7 އަށްވުރެ ދަށްކުރުމަށް އެއްބަސްވެއްޖެނަމަ، އީރާނާއި ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލައި، އީރާނާއެކު ވިޔަފާރިކުރުމުން އެމެރިކާއަށް މާބޮޑަށް ފައިދާވާނެ ކަމަށް އެމެރިކާއިން ދެކޭކަމަށްވެސް މި ނޫހުން ފާހަގަކޮށްފައިވެއެވެ.

އީރާނުގެ ނިއުކްލިއާ މައްސަލަ ހައްލުކުރުމަށްޓަކައި ޓްރަމްޕްގެ ސަރުކާރުން ވަނީ ގަލްފުގެ ގައުމެއްކަމަށްވާ އޮމާން މެދުވެރިކޮށް ނުސީދާކޮށް އީރާނާއެކު މަޝްވަރާތައް ފަށާފައެވެ. މިހާތަނަށް މި މަޝްވަރާތަކުގެ ފަސް ބުރު ބޭއްވިފައިވާއިރު، އެންމެ ފަހުގެ ބުރުން ކޮންމެވެސް ވަރެއްގެ ކުރިއެރުންތަކެއް ލިބިފައިވާކަން އެމެރިކާއާއި އީރާނުން ވަނީ ހާމަކޮށްފައެވެ. ނަމަވެސް، އީރާނުން ޔޫރޭނިއަމް ފައްކާކުރުމުގެ މައްސަލަ އަދިވެސް ހައްލުނުވެ އޮތްކަން ފާހަގަކުރެވެއެވެ.

އީރާނާއި ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ ތެރެއިން އުވާލަން އެމެރިކާ މިހާރު މަސައްކަތްކުރަނީ ކޮން ބާވަތެއްގެ ފިޔަވަޅުތަކެއްކަން އަދި ސާފެއް ނުވެއެވެ. ނަމަވެސް، މި މައްސަލައިގައި ދެ ގައުމުގެ ދެމެދުގައި ކުރިއަށްދާ މަޝްވަރާތަކުން ކޮންމެވެސް ވަރެއްގެ ހައްލެއް ލިބޭނެ ކަމަށް މަސްރަޙް ދިރާސާކުރާ ފަރާތްތަކުން ބުނެއެވެ.