ސޯޝަލް މީޑިއާގެ ޕްލެޓްފޯމެއްގައި ބަރަހަނާވެ ޖިންސީ އަމަލު ހިންގި ދިވެހި އަންހެނެއްގެ މައްސަލަ ފުލުހުން ބަލަން ފަށައިފިއެވެ.
ފުލުހުން މީޑިއާތަކާ ހިއްސާކުރި މަޢުލޫމާތުގައި ބުނެފައިވަނީ މިދިޔަ ހުކުރު ދުވަހު ސޯޝަލް މީޑިއާގެ ޕްލެޓްފޯމެއްގައި ލައިވްވި ދިވެހި އަންހެނަކު ބަރަހަނާވެ ޖިންސީ އަމަލުތަކެއް ހިންގާފައިވާ ކަމަށް ފުލުހުންނަށް ރިޕޯޓުކޮށްފައިވާ ކަމަށެވެ. އަދި ފުލުހުންގެ ޚިދުމަތުން އެ މައްސަލަ ތަޙުޤީޤު ކުރަމުންދާ ކަމަށް ވެސް ބުނެފައިވެއެވެ.
ސްނެޕް އާއި ޓިކްޓޮކް ފަދަ އެޕްލިކޭޝަންތަކުން ބަދުއަޚުލާޤީ ޢަމަލު ހިންގުމާއި ލައިވްވުން މިހާރު ދިވެހިންގެ މެދުގައި މަޤްބޫލުވެފައިވާއިރު، މިފަދަ ލައިވްތަކުގައި ބަދުއަޚްލާޤީ ވާހަކަ ދެއްކުމާއި، އާންމު އިޖުތިމާޢީ މިންގަނޑުތަކާއި ޚިލާފު މަންޒަރު ދެއްކުން ވެސް ދޭތެރެއަކުން ފެންމަތިވަމުންދާކަން ފާހަގަކުރެވެއެވެ.
މީގެ ދުވަސްތަކެއް ކުރިން ޓިކްޓޮކްގައި ބަރަހަނާ ވީޑިއޯ ހަދައި އާންމުކުރި މައްސަލައިގައި ދިވެހި ފިރިހެނަކު ޖަލަށް ލާފައިވާކަން ވެސް ފާހަގަކޮށްލެވެއެވެ.
މި ބާވަތުގެ މައްސަލަތައް އިތުރުވަމުން ދިއުމާ ގުޅިގެން، އިޖުތިމާޢީ ގޮތުން ކަންބޮޑުވުން ފާޅުކުރަމުންދާއިރު، ސޯޝަލް މީޑިއާ ބޭނުންކުރުމުމުގައި ޒިންމާދާރުވާން ޖެހެއެވެ. އަދި މިފަދަ ޢަމަލުތަކަކީ ދިވެހި މުޖުތަމަޢުގެ އަޚްލާޤީ މިންގަނޑުތަކާއި އިސްލާމްދީނުގެ އުސޫލުތަކާއި ޚިލާފު ކަންކަން ކަމަށް ވެސް ފާހަގަކުރެވެއެވެ.
