ކާލޯ އެންޗެލޮޓީ ރިއަލް މެޑްރިޑްގައި އޭނާގެ ފެއަރވެލް މެޗު މޮޅަކުން ނިންމާލައި ސަޕޯޓަރުންގެ ހިތްތައް ރޮއްވާލައިފިއެވެ. ވަދާޢީ މެޗުގައި މިރޭ ރިއަލް ސޮސިއެދާދު ބަލިކުރީ 2-0 އިންނެވެ. މި މެޗަކީ އެންޗެލޮޓީ ބްރެޒިލްގެ ޤައުމީ ޓީމުގެ ހެޑް ކޯޗުކަމާއި ރަސްމީކޮށް ޙަވާލުވުމުގެ ކުރިން ސްޕޭނުގައި އޭނާ އިރުޝާދުދިން ފަހު މެޗެވެ.

މި މެޗުގައި ދެގޯލު ވެސް ޖަހައިދިނީ އެމްބަޕޭއެވެ. ފުރަތަމަ ގޯލު އޭނާ ޖެހީ 38 ވަނަ މިނެޓްގައެވެ. ދެވަނަ ގޯލު ޖެހީ 83 ވަނަ މިނެޓްގައި ވިނީސިއަސް ޖޫނިއަރގެ ޕާހަކާ އެކުގައެވެ. މި ކާމިޔާބީއާއިއެކު ރިއަލް މެޑްރިޑް ވަނީ ލަ ލީގާގައި 84 ޕޮއިންޓާއެކު ދެވަނައަށް އަރާފައެވެ.

^{އެންޗެލޮޓީގެ ވަދާޢީ މެޗުގައި ދެގޯލު ޖަހައިދިން ރިއަލްގެ ފްރާންސްގެ ތަރި އެމްބާޕޭ (ކ). ފޮޓޯ: ޔާހޫ.ކޮމް}

މި މެޗަކީ ލޫކާ މޮޑްރިޗްގެ ވެސް ފަހު މެޗެވެ. 85 ވަނަ މިނެޓްގައި އޭނާ ބަދަލުކުރުމުން، ކުޅުންތެރިންނާއި ސަޕޯޓަރުން އޭނާއަށް ހޫނު މަރުހަބާއެއް ކިޔައި، ގާޑް އޮފް އޮނަރެއް ދިނެވެ. މިއީ މޮޑްރިޗްގެ 13 އަހަރުގެ ކެރިއަރގެ ފަހު މެޗެވެ.

^{ރިއަލް މެޑްރިޑްގެ ލެޖެންޑް ލޫކާ މޮޑްރިޗް އޭނާގެ ވަދާޢީ މެޗުގެ 85 ވަނަ މިނެޓްގައި 2-0ގެ މޮޅާއެކު އަތްޖަހަމުން ދަނޑުން ފައިބަނީ. / ފޮޓޯ: ޔާހޫ.ކޮމް}

އުމުރުން 65 އަހަރުގެ އެންޗެލޮޓީ ވަނީ ރިއަލް އާއި އެކު ޖުމްލަ 15 ޓްރޮފީ ކާމިޔާބުކޮށްފައެވެ. އޭގެ ތެރޭގައި ފާއިތުވި ސީޒަންގައި ކާމިޔާބުކުރި ޗެމްޕިއަންސް ލީގާއި ލަލީގާ ޓައިޓަލް ހިމެނެއެވެ.

އެންޗެލޮޓީ ރިއަލްއާއެކު އޮތް އެއްބަސްވުން ހަމަވާން އޮތީ ޖޫން 2026 ގައި ނަމަވެސް، އޭނާ އެއްބަސްވުން ހަމަވުމުގެ ކުރިން ކްލަބާއި ވަކިވެ، ހޯމަ ދުވަހު ބްރެޒިލްއާއެކު މަސައްކަތް ފަށާނެއެވެ. އެންޗެލޮޓީގެ ބަދަލުގައި ރިއަލް މެޑްރިޑްއާއި ހަވާލުވާނީ ބަޔާ ލެވަކޫސަންއަށް ބުންޑަސްލީގާ ކާމިޔާބުކޮށްދިން، އަދި ކުރީގެ ރިއަލް މެޑްރިޑް ކުޅުންތެރިޔާ ޒަބީ އަލޮންސޯއެވެ.