2016 ވަނަ އަހަރު އެކަޑަމީ އެވާޑް ލިބުނު މަޝްހޫރު އެނިމޭޓެޑް ކާޓޫން ޒޫޓޯޕިއާގެ ދެވަނަ ބައިގެ ޓްރެއިލާ ނެރެފިއެވެ.

މި ކާޓޫން ނެރޭނީ މިއަހަރުގެ ނޮވެންބަރު މަހުގެ 28 ވަނަ ދުވަހު އިންޑިއާގައެވެ. އަދި މި ކާޓޫން އިނގިރޭސި، ހިންދީ، ތަމިލް އަދި ތެލުގު ބަހުން ބެލުމުގެ ފުރުސަތު ލިބިގެންދާނެއެވެ.

މި ޓްރެއިލާގައި ދައްކުވައިދެނީ އެންމެންގެ ލޯބި ލިބިފައިވާ 'ޑުއޯ' ކަމުގައިވާ ޖުޑީ ހޮޕްސް އަދި ނިކްވައިޑެވެ. ޖުޑީއަކީ އަލަށް ފުލުހުންނާ ގުޅުނު އަންހެން މުސަޅެކެވެ. އޭނާއަށް އަޑުއަޅާފައިވަނީ ގިންފާ ގޫޑްވިންއެވެ. އަދި ނިކްވައިޑްއަކީ މަކަރުވެރި ހިޔަޅެކެވެ. އޭނާއަށް އަޑުއަޅާފައިވަނީ ޖޭސަން ބެޓެމޭންއެވެ.

ޒޫޓޯޕިއާގެ މި އާ ސީރީޒްގައި އާ ޝަހުސިއްޔަތެއްގެ ގޮތުގައި ގަރީ ޑެސްނޭކް ކިޔާ ހަރުފައެއް ތަޢާރަފުކޮށްފައިވެއެވެ. މި ހަރުފައަށް އަޑުއަޅާފައިވަނީ ކެހުއި ކުއާންއެވެ. އަދި މިއީ މި ސީޒަންގެ ނުބައި ބައި ކުޅޭ ކެރެކްޓަރު ކަމަށްވެސް ބެލެވެއެވެ. ޓްރެއިލާއިން ދައްކާގޮތުގައި ޖުޑީ އާއި ނިކް އެކުގައި ގޮތްނޭނގޭ ކޭސްތަކެއް ތަޙުޤީޤުކޮށް، އޭގެ ޙަޤީޤަތް ހޯދަން މަސައްކަތްކުރާތަން ފެނެއެވެ.

މި ޓްރެއިލާ ނެރުމާއިއެކު ގިނަ ސަޕޯޓަރުންގެ ފޯރި ވަނީ އިތުރުވެފައެވެ. ގިނަ ސަޕޯޓަރުން ބުނާގޮތުގައި މިއީ އެތައް ބައެއްގެ އުންމީދުތައް ފުރިހަމަވުމެކެވެ.

މި ކާޓޫނަކީ ޖެރެޑް ބުޝް އަދި ބައިރޮން ހޮވާޑް ޑައިރެކްޓްކޮށްފައިވާ ކާޓޫނެކެވެ. 2016 ވަނަ އަހަރު ޒޫޓޯޕިއާއަށް ވަނީ އެންމެ މޮޅު އެނިމޭޓެޑް ފީޗަރ ފިލްމުގެ އޮސްކާ އެވޯޑް ލިބިފައެވެ. މި ފަހަރުވެސް މި ސީރީޒް ޕްރޮޑިއުސްކޮށްފައިވަނީ ވެތް މެރިނޯއެވެ.

މި ކާޓޫނުގައި އެމެރިކާގެ މަޝްހޫރު ލަވަކިޔުންތެރިޔާ ޝަކީރާވެސް ބައިވެރިވެފައިވެއެވެ. ޝަކީރާ އަޑުއަޅާފައިވަނީ މި ކާޓޫންގެ ލަވަކިޔުންތެރިޔާ ޖެޒޭލްގެ ކަރެކްޓަރަށެވެ.

މި ކާޓޫނަކީ ކުޑަކުދިންނާއި ބޮޑެތި މީހުންނަށްވެސް އެއްވަރަކަށް މަޤުބޫލު ކާޓޫނެއްކަމަށްވުމާއެކު، މި ކާޓޫންގެ ދެވަނަ ބައި ނެރުމާއެކު ގިނަ ބައެއްގެ ޝައުޤުވެރިކަން އިތުރުވެފައިވާކަން ފާހަގަކުރެވެއެވެ.