ޅ. އަތޮޅު ގާއެރި ފަޅު ކައިރީގައި ލޯންޗަކާއި ޑިންގީއެއް ޖެހި ހިނގި އެކްސިޑެންޓެއްގައި ފަސް މީހަކަށް އަނިޔާވެއްޖެއެވެ. މި ހާދިސާ ހިނގާފައިވަނީ ރޭ 12:33 ހާއިރުގައި ކަމަށް މޯލްޑިވްސް ޕޮލިސް ސަރވިސްއިން ބުނެއެވެ.
އެކްސިޑެންޓުގައި ގެއްލުން ލިބުނު ޑިންގީ ބޭނުން ނުކުރެވޭ ވަރަށް ހަލާކުވެފައި.
ފުލުހުން ބުނި ގޮތުގައި މި ހާދިސާގައި އަނިޔާވި ފަސް މީހުންނަކީވެސް ދިވެހި ފިރިހެނުންނެވެ. އެ ފަސް މީހުންނަށް އެކި ވަރުގެ އަނިޔާތައް ވެފައިވާއިރު، އޭގެ ތެރެއިން އެއް މީހަކަށް ވަނީ ސީރިއަސް އަނިޔާތަކެއް ލިބިފައެވެ. އަނިޔާވި މީހުންނަށް މިހާރު ވަނީ ޅ. އަތޮޅު ހޮސްޕިޓަލުގައި ފަރުވާ ދޭން ފަށާފައެވެ.
މި ހާދިސާ ހިނގާފައިވަނީ ގާއެރި ފަޅު ކައިރިއަށް ފީނަން ނިކުމެ އުޅުނު ބަޔަކު ތިބި ޑިންގީއަކަށް ލޯންޗެއް ޖެހުމުގެ ސަބަބުންނެވެ. މި ހާދިސާގައި ޑިންގީ ވަނީ ބޭނުން ނުކުރެވޭ ވަރަށް ހަލާކުވެފައެވެ.
ފުލުހުން ވިދާޅުވީ މި މައްސަލައިގެ ތަޙްޤީޤު މިހާރު ކުރިއަށް ގެންދަމުންދާ ކަމަށެވެ.
