މިދިޔަ 30 ދުވަހުގެ ތެރޭގައި އިޒްރޭލުގެ ހަނގުރާމަވެރި ޒައެނިސްޓުން ޣައްޒާގެ 2،000 އަށްވުރެ ގިނަ މީހުން ޝަހީދު ކޮށްލައިފި ކަމަށް ތަފާސްހިސާބުތަކުން ދައްކައިފިއެވެ.
2023 ވަނަ އަހަރުގެ އޮކްޓޯބަރު މަހުން ފެށިގެން މިހާތަނަށް މި ހަނގުރާމައިގައި ޝަހީދުވެފައިވާ މީހުންގެ އަދަދު 70،000 އަށްވުރެ މަތިވެއްޖެ ކަމަށް ބައެއް މަސްދަރުތަކުން ބުނެއެވެ. އަދި 1 ލައްކަ 20،000 އަށްވުރެ ގިނަ މީހުން ޒަޚަމްވެފައިވާ ކަމަށް ވެސް ބައެއް މަސްދަރުތަކުން ބުނެއެވެ.
މިދިޔަ 30 ދުވަހު އެންމެ ވަރުގަދަޔަށް ހަމަލާ ދިނީ ޖަބާލިޔާ އަދި ޚާން ޔޫނިސް ފަދަ އެންމެ ގިނައިން މީހުން ދިރިއުޅޭ ސަރަހައްދުތަކަށް ކަމަށްވާއިރު ޒައެނިސްޓުން ރޭ ވެސް ވައިގެ މަގުން ވަރުގަދަ ހަމަލާތައް ދިނެވެ. ރޭގެ ހަމަލާތަކުގައި މަދުވެގެން 70 މީހުން ޝަހީދުވެފައިވާއިރު އޭގެ ތެރޭގައި 22 ކުޑަކުދިންނާއި 15 އަންހެނުން ހިމެނޭ ކަމަށް ރަސްމީ މަސްދަރުތަކުން ބުނެއެވެ.
އިޒްރޭލުން ވަނީ ޣައްޒާއަށް ވަދެ ނުކުމެވޭނެ ހުރިހާ ސަރަހައްދެއް ބަންދުކޮށްފައެވެ. އެހެންކަމުން ކާނާއާއި ބޭސް ވެއްދޭނެ އެއްވެސް ގޮތެއް ނެތެވެ. މީގެ ސަބަބުން ޣައްޒާ ވަނީ ބަނދަށް ޖެހިފައެވެ. އދ. އިން ވެސް ވަނީ ޣައްޒާ އަކީ ބަނޑަށް ޖެހިފައިވާ ތަނެއް ކަމަށް ނިންމާފައެވެ.
ޣައްޒާގެ އިދާރާތަކުން ބުނާ ގޮތުގައި ކާބޯތަކެއްޗާއި، ފެނާއި، ބޭސްފަރުވާ ހުއްޓުވާލާފައިވާތީ، ގާތްގަނޑަކަށް 500،000 އަށްވުރެ ގިނަ މީހުންނަށް ބަނޑުހައިހޫނުކަމުގެ ނުރައްކަލާ ކުރިމަތިލާންޖެހިފައިވެއެވެ.
ހުޅަނގުގެ ބައެއް ގައުމުތަކުން މިކަން ކުށްވެރިކުރައްވާއިރު އެމެރިކާއިން ދަނީ އިޒްރޭލަށް ތާއީދު އިތުރުކުރުމަށް ގިނަ މަސައްކަތްތައް ކުރަމުންނެވެ. އެގޮތުން ސީރިއާއަށް އަޅާފައިވާ ދަތިކުރުމުގެ ފިޔަވަޅުތައް އުވާލައި ސީރިއާގެ ތާއީދު އިޒްރޭލަށް ދިނުމަށް ޓްރަމްޕް ވަނީ އެދިވަޑައިގެންފައެވެ. މިކަމުގައި ސީރިއާގެ ސަރުކާރުން ރަސްމީކޮށް އަދި އެއްޗެކޭ ބުނެފައި ނުވިޔަސް، މަސްދަރުތަކުން ބުނާ ގޮތުގައި ސީރިއާ ސަރުކާރު އޮތީ އިޒްރޭލާއި ގުޅެން ތައްޔާރަށެވެ.
އިސްރާއީލުގެ ޢަމަލުތައް ކުށްވެރިކުރައްވައި ފްރާންސްގެ ރައީސް އެމެނުއެލް މެކްރޯން ވަނީ ސުލްހައިގެ މަސައްކަތްތައް އަލުން ފެށުމަށް ގޮވާލައްވާފައެވެ.
އިޒްރޭލުގެ ބޮޑުވަޒީރު ބެންޖަމިން ނެތަންޔާހޫ ވަނީ ކުރިއަށް އޮތް ތަނުގައި ޣައްޒާއަށް މިހާރަށް ވުރެ ފުޅާ ކޮށް ހަމަލާ ދޭން ރާވާފައިވާ ކަމަށް އިއުލާން ކުރައްވާފައެވެ.
