ފުޓްބޯޅައިގައި ސްޕެއިންގެ ގަދަ ދެ ބާރު ކަމަށްވާ ރިއަލް މެޑްރިޑް އަދި ބާސެލޯނާގެ ކުރިމަތިލުން (އެލް-ކްލެސިކޯ)، ބާސެލޯނާއިން ކާމިޔާބުކޮށް ކޮޕަ ޑެލް ރޭ ގެ ތަށި 32 ވަނަ ފަހަރަށް އުފުލާލައިފިއެވެ.

ސެވިއްޔާގެ ދަނޑުގައި ކުޅުނު މި މެޗު ބާސެލޯނާއިން ކާމިޔާބުކޮށްފައިވަނީ 3-2 ގެ ނަތީޖާއިންނެވެ. ބާސެލޯނާ މި މެޗު ކާމިޔާބުކުރީ، މެޗުގެ 90 މިނެޓު ހަމަވުމުން ނަތީޖާ ނެރުމަށް ކުޅުނު 15 މިނެޓުގެ ދެވަނަ ހާފުގައެވެ.

އެލް-ކްލެސިކޯގެ ފޯރި މި މެޗުގައި ފެނިގެން ދިޔައިރު ފުރަތަމަ ހާފުގައި ފުރަތަމަ ގޯލު ކާމިޔާބުކޮށްފައިވަނީ ބާސެލޯނާގެ މެދަށް ކުޅޭ ޕެޑްރީ އެވެ. ލަމިން ޔަމާލް ތަނަވަސްކޮށްދިން މި ފުރުސަތުގައި އޭނާ ގޯލުގެ މަތީ ކަނަށް ފޮނުވާލީ އޭރިޔާ ބޭރުން ވަރަށް ބާރަށެވެ.

ދެވަނަ ހާފުގައި މެޑްރިޑަށް ނަތީޖާ ހަމަހަމަކޮށްދިނީ އެމްބާޕޭ އެވެ. މެޑްރިޑަށް ލިބުނު ހިލޭ ޖެހުން އޭނާ ގޯލަށް ފޮނުވާލި ބޯޅަ ވަނީ ތިރީ ދަނޑީގައި ޖެހިފައެވެ. އޭގެ 7 މިނެޓު ފަހުން މެޑްރިޑަށް ލީޑު ނަގައިދިނީ ޓުޗަމެނީ އެވެ. އޭނާ މި ގޯލު ކާމިޔާބުކުރީ އަރްދާ ގުލަރ ނެގި ކޯނަރު ބޮލުން ގޯލަށް ވައްދާލައިގެންނެވެ.

ފަހަތުން އަރައި މެޑްރިޑުން މެޗުގެ ނަތީޖާ ބަދަލުކޮށްލި ނަމަވެސް 84 ވަނަ މިނެޓުގައި ލަމިން ޔަމާލްގެ ހިތްގައިމު ޕާހުގެ ބޭނުން ހިފައި ނަތީޖާ ހަމަހަމަކޮށްދިނީ ބާސެލޯނާގެ ފޯވާޑު ފެރަން ޓޮރޭސް އެވެ.

90 މިނެޓު ހަމަވިއިރު 2-2 އޮތުމުން ނަތީޖާ ނެރުމަށް ކުޅުނު 15 މިނެޓުގެ ދެވަނަ ހާފުގައި ބާސެލޯނާއަށް 32 ވަނަ ފަހަރަށް ތަށި އުފުލާލުމުގެ އުފާ ހާސިލްކޮށްދިނީ އެޓީމުގެ ޑިފެންޑަރު ކުންޑޭ އެވެ. އޭނާ މި ގޯލު އޭރިޔާ ބޭރުން ކާމިޔާބުކުރީ މެޑްރިޑުން ހެދި ގޯހެއްގެ ބޭނުން ހިފައިގެންނެވެ.

މެޗު ނިމެންދަނިކޮށް މެޗު ހޫނުވެ ރިއަލްގެ ޑިފެންޑަރު އެންޓޯނީ ރުޑިގާ އަށް ވަނީ ރަތް ކާޑެއް ދައްކާފައެވެ.

ބާސެލޯނާ ކޮޕަ ޑެލް ރޭ ރެކޯޑު އަދަދަކަށް އުފުލާފައިވާއިރު އެޓީމާއި އެންމެ ގާތުން ހޯދާފައިވަނީ އެތްލެޓިކް ބިލްބާއޯ އެވެ. އެ ކުލަބުން 24 ފަހަރު ތަށި ނަގާފައިވާއިރު މެޑްރިޑު މި ތަށި ނަގާފައިވަނީ 20 ފަހަރު އެވެ.

އެލް-ކްލެސިކޯގެ ކުރިމަތިލުމެއް ދެން ފެންނާނީ އަންނަ މަހު 11 ގައެވެ. ލަލީގާގައި މި ދެޓީމު ވާދަކުރާ މެޗު އޮންނާނީ ބާސެލޯނާގެ ދަނޑުގައެވެ.