އާސެނަލްގެ ގާނާގެ މިޑްފީލްޑަރު ތޯމަސް ޕާޓޭއާއެކު އޮތް އެއްބަސްވުން އައުކުރުމާ ގުޅޭގޮތުން ރަސްމީ މަޝްވަރާތައް ފަށައިފިއެވެ. ޕާޓޭގެ މިހާރުގެ އެއްބަސްވުން ހަމަވާނީ މި އަހަރުގެ ޖޫން މަހުގައެވެ. އުމުރުން 30 އަހަރުގެ މި ކުޅުންތެރިޔާއަށް މި ސީޒަނުގައި ވަނީ އިންޖަރީތަކާ ކުރިމަތިލާން ޖެހިފައެވެ. ނަމަވެސް މެނޭޖަރު މިކެލް އާޓެޓާ ދެކޭގޮތުގައި މިޑްފީލްޑުގައި ޕާޓޭގެ އެހީތެރިކަން ހޯދުން ވަރަށް މުހިންމެވެ.
ޕާޓޭ އާސެނަލްއާ ގުޅުނީ 2020 ވަނަ އަހަރު އެޓްލެޓިކޯ މެޑްރިޑުންނެވެ. އިންޖަރީގައި ނުހުންނަ ދުވަސްވަރު ޕާޓޭއަކީ ޓީމުގެ މުހިންމު ތަނބެކެވެ. ނިސްބަތުން ޒުވާން އާސެނަލްގެ ސްކޮޑަށް މުހިންމު އެސެޓެކެވެ. މި ސީޒަނުގައި މަދު މެޗުތަކެއްގައި ބައިވެރިވެފައިވީ ނަމަވެސް، ޕްރެޝަރު ބޮޑު މެޗުތަކުގައި އޭނާގެ މުހިންމުކަމާއި މެޗުގެ ޓެމްޕޯ ކޮންޓްރޯލްކުރުމުގެ ޤާބިލުކަން މީޑިއާތަކަށް ވެސް ވަނީ ފާހަގަކުރެވިފައެވެ.
މުސާރައިގެ ގޮތުގައި ގާތްގަނޑަކަށް ހަފްތާއަކު 200،000 ޕައުންޑް ޕާޓެއަށް ދޭއިރު، ކްލަބާއި ގާތް މަސްދަރުތަކުން ބުނާ ގޮތުގައި އައު އެއްބަސްވުމެއްގެ މަޝްވަރާތައް މިހާރު ވަނީ ފެށިފައެވެ. އަދި ދެފަރާތުންވެސް ބޭނުންވަނީ ހުރިހާ ފަރާތްތަކަށް ފައިދާވާނެ އެއްބަސްވުމަކަށް ވާސިލުވާން ކަމަށާއި އާސެނަލްއިން ބަލަމުންދަނީ ކުރު މުއްދަތެއްގެ އެގްރީމެންޓެކެވެ. އެއީ އިތުރު އެއްއަހަރު ނުވަތަ ދެ އަހަރު ކަމަށް ބެލެވެއެވެ.
ސައުދީ އަރަބިއާ އަދި އިޓަލީގެ ކްލަބުތަކުން ޕާޓޭއަށް ޝައުޤުވެރިކަން އިތުރުވަމުންދާކަން އާސެނަލް އަށް ވެސް އެނގެއެވެ.
ތޯމަސް ޕާޓޭ އާސެނަލްއާ ގުޅުނީ 50 މިލިއަން ޔޫރޯ އަށެވެ. އޭނާ 112 މެޗް ކުޅެ، 5 ގޯލް ޖަހައި، 4 އެސިސްޓް ފޯރުކޮށްދީ، 6،000 އަށް ވުރެ ގިނަ ޕާސް ފުރިހަމަކޮށްފައެވެ.
ޕާޓޭ އިސްލާމްވީ 2022 ވަނަ އަހަރުއެވެ.
