ޖޫން މަހު ސްރީ ލަންކާގައި ބޭއްވުމަށް ހަމަޖެހިފައިވާ ސާފް ޗެމްޕިއަންޝިޕް އަންނަ އަހަރަށް ފަސްކޮށްފި އެވެ. އޭގެ ބަދަލުގައި އެ ދުވަސްވަރު ލަންކާގައި ބޭއްވުމަށް މިހާރު ރާވަމުންދަނީ އިންވިޓޭޝަނަލް މުބާރާތެކެވެ.
ސާފްގެ އެގްޒެކެޓިވް ކޮމިޓީ މެމްބަރު އަލީ އުމަރު ވިދާޅުވި ގޮތުގައި މުބާރާތް ފަސްކުރީ މާކެޓިން ޕާޓްނަރު ބޭނުންވަނީ ހޯމް އެންޑް އަވޭ އުސޫލުން މުބާރާތް ބޭއްވުމަށް ކަމަށްވެފައި، މި އަހަރު އެގޮތަށް ބޭއްވެން ނެތުމުންނެވެ. ފުރަތަމަ މަސައްކަތްކުރީ މި އަހަރު ވެސް އެ އުސޫލުން މުބާރާތް ބޭއްވުމަށެވެ. ނަމަވެސް އެގޮތަށް ބާއްވާނަމަ މުބާރާތުގެ މުއްދަތު ދިގުލައި، ހަރަދުތައް ބޮޑުވާނެތީ ސެންޓްރަލައިޒްކޮށް ލަންކާގައި ބޭއްވުމަށް ނިންމި އެވެ.
ބަންގްލަދޭޝްގެ "ޑެއިލީ އޮބްޒާވާ" ނޫހުން ރިޕޯޓްކޮށްފައިވާ ގޮތުގައި، މާކެޓިން ޕާޓްނަރު "ސްޕޯޓްސްފައިވް" އިން ބޭނުންވީ ސެންޓްރަލައިޒްކޮށް ކުޅޭނަމަ އިންޑިއާ ނުވަތަ ބަންގްލަދޭޝްގައި މުބާރާތް ބޭއްވުމަށެވެ. އެއީ ސްޕޮންސަރުން ހޯދުމަށް ފަސޭހަވާނެތީ ކަމަށް ބެލެވެ އެވެ.
މުބާރާތް ބާއްވާ ގައުމު ކަނޑައެޅުމުގައި އަބަދުވެސް ސާފްގެ މާކެޓިން ޕާޓްނަރުންގެ ނުފޫޒު އޮވެ އެވެ. މި ފަހަރު ވެސް ހޯމް އެންޑް އަވޭ އުސޫލުން ނޫން ގޮތަކަށް، އަދި އިންޑިއާ އާއި ބަންގްލަދޭޝް ނޫން ގައުމެއްގައި ބާއްވާތީ މާކެޓިން ޕާޓްނަރު ޖެހުމުން ސާފް އަށް މަޖުބޫރުވީ މުބާރާތް ފަސްކުރާށެވެ.
ސާފްގެ ރައީސް ކާޒީ ސަލާހުއްދީން ވިދާޅުވެފައިވަނީ މުބާރާތް ބާއްވާންވާނެ ތަނެއް ނިންމާނީ މާކެޓިން ޕާޓްނަރު ބަލަންޖެހޭ ކަންކަން ބެލުމަށްފަހު، އަންނަ މަހު ނޭޕާލުގައި އޮންނަ ކޮންގްރެސްގައި ކަމަށެވެ.
ސާފް ޗެމްޕިއަންޝިޕަށް ތައްޔާރުވުމުގެ ގޮތުން ތިންމަސްދުވަހަށް ދިވެހި ޓީމުން ވަނީ ވަގުތީ ކޯޗެއް ހޯދުމަށް ވެސް އިޢުލާން ކޮށްފައެވެ. ނަމަވެސް މުބާރާތް ފަސްކުރުމުގެ ސަބަބުން މިކަމުގައި ދެން ޢަމަލުކުރާނެ ގޮތެއް އަދި ފުޓްބޯޅަ އެސޯސިއޭޝަން އޮފް މޯލްޑިވްސް (އެފް.އޭ.އެމް) އިން ބުނެފައެއް ނެތެވެ.
ސާފްގެ ބަދަލުގައި އޭއެފްސީ އާއި ސާފް އަދި ލަންކާ ފުޓްބޯޅަ ފެޑެރޭޝަން ގުޅިގެން އިންވިޓޭޝަނަލް މުބާރާތެއް ބޭއްވުމަށް މަސައްކަތްކުރަމުންދާއިރު، އެ މުބާރާތުގެ ތަފްސީލު އަދި ހާމަކޮށްފައެއް ނުވެ އެވެ.
