ރިޔާސީ އިންތިޚާބު އެއް ބުރުން ނިންމުމަށްޓަކައި ޕްރިފެރެންޝަލް ވޯޓިން ނިޒާމަކަށް ވަކާލާތުކުރައްވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ސަރުކާރުގެ މަސައްކަތްތަކުގެ މަޢުލޫމާތު ފޯރުކޮށްދިނުމަށް ހުޅުވާލި ވަޓްސްއެޕް ޗެނަލްގައި އެމަނިކުފާނުގެ މެސެޖު ފޯރުކޮށްދެއްވިއިރު މިއަހަރުގެ ތެރޭގައި މި ނިޒާމަށް ބަދަލުވުމާ ގުޅޭގޮތުން ރައްޔިތުންގެ ޚިޔާލު ހޯދުމަށް ވޯޓެއް ނެގުމަކީ މުހިންމު ކަމެއް ކަމަށް ސިޔާސީ ތަޖުރިބާކާރުން ޤަބޫލުކުރައްވައެވެ.

މިދިޔަ އަހަރުގެ ނޮވެމްބަރު މަހު ރައީސް މުއިއްޒު ވިދާޅުވެފައިވަނީ، ޕްރިފެރެންޝަލް ނިޒާމަކަށް އަމަލުކުރުމާ ގުޅޭގޮތުން އެޓާނީ ޖެނެރަލްގެ އޮފީހުން ދިރާސާތައް ކުރަމުންދާ ކަމަށެވެ. އަދި މި ނިޒާމަކީ ރާއްޖެއަށް އެންމެ ރަނގަޅު ގޮތްކަމަށްވާނަމަ، ރައްޔިތުންގެ މަޖިލިސް މެދުވެރިކޮށް، ކުރިއަށް އޮތް ރިޔާސީ އިންތިޚާބުން ފެށިގެން އެއް ބުރުން އިންތިޚާބު ނިންމޭ ގޮތަށް ބަދަލުކުރުމަށް ގަސްދުކުރައްވާ ކަމަށެވެ.

ރައީސް މުއިއްޒުގެ މި ހިޔާލުފުޅަށް ކުރީގެ ރައީސް އަދި ރައްޔިތުންގެ މަޖިލީހުގެ ކުރީގެ ރައީސް މުޙައްމަދު ނަޝީދުވެސް ވަނީ ތާއީދުކުރައްވާފައެވެ. އެކްސްގައި ކުރެއްވި ޕޯސްޓެއްގައި ނަޝީދު ވިދާޅުވެފައިވަނީ، ޕްރިފެރެންޝަލް ވޯޓާއެކު އެއް ބުރުން ވޯޓުލާ ނިންމައި، ސަރުކާރެއް އުފެއްދުމުގެ އުސޫލަކީ ރަނގަޅު އުސޫލެއް ކަމަށެވެ.

މި ނިޒާމަކީ ރާއްޖެއަށް އެންމެ ރަނގަޅު ނިޒާމް ކަމަށް ބެލެވޭ އެންމެ ބޮޑު އެއް ސަބަބަކީ ޚަރަދު ކުޑަވެފައި ބާރުތައް ބެހިގެން ދިޔުމެވެ.