ރާއްޖޭގެ ޤައުމީ ފުޓްބޯޅަ ޓީމަށް ތިންމަސްދުވަހުގެ ކޮންޓްރެކްޓެއްގެ ދަށުން ކޯޗަކާއި ކޯޗިންގ ސްޓާފުން ހޯދުމަށް ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިޢުލާންކޮށްފިއެވެ.
މި އިޢުލާނުގައި ވާގޮތުން ހޯދަން ބޭނުންވަނީ ހެޑްކޯޗުގެ އިތުރުން އެސިސްޓަންޓް ކޯޗު، ގޯލްކީޕަރ ޓްރެއިނަރު، ފިޒިކަލް ޓްރެއިނަރު އަދި ޓީމު ޑޮކްޓަރެވެ. ކޯޗުގެ ޝަރުތުތަކުގެ ތެރޭގައި އޭއެފްސީ/ޔުއެފާ ޕްރޯ ލައިސަންސް އަދި 6 އަހަރުގެ ތަޖުރިބާ ހިމެނެއެވެ.
އެފްއޭއެމްގެ ޖެނެރަލް ސެކްރެޓަރީ މުޙައްމަދު ޝުޖާޢު ވިދާޅުވީ ޓީމަށް ކޯޗަކު ނެގުމަށް ވުރެ، މި ފަހަރު އިޢުލާންކުރީ ވީހާވެސް ހަމަހަމަކޮށް އެކަން ގެންދިއުމަށް ކަމަށެވެ. އަދި މިގޮތަށް ހުޅުވާލުމުން މާ ރަނގަޅު ކޯޗެއް ލިބިދާނެ ކަމުގެ އުންމީދު އޮތް ކަމަށް ވެސް ވިދާޅުވިއެވެ.
މި ކޯޗު ހޯދަނީ ޖޫން މަހު ސްރީލަންކާގައި އޮންނަ ސާފް ޗެމްޕިއަންޝިޕަށެވެ. އެފްއޭއެމްގެ ނޯމަލައިޒޭޝަން ކޮމިޓީގެ ދައުރު ޖުލައި މަހު ހަމަވާތީ، އޭގެ ފަހުން ހަވާލުވާ ބަޔަކަށް ދިގު މުއްދަތުގެ ކޮންޓްރެކްޓެއްގެ ދަށުން ކޯޗަކު ހޯދުމުގެ ފުރުޞަތު ދިނުމަށް ވިސްނާފައިވާ ކަމަށް ބެލެވެއެވެ.
ނަމަވެސް، މުބާރާތެއް ނެތުމުން ޤައުމީ ޓީމު ނެގުމުގައި ދަތިތަކާ ކުރިމަތިވާނެ ކަމަށް ބެލެވެއެވެ. އެފްއޭއެމުން މިހާރު މަސައްކަތްކުރަމުންދަނީ ކުރު މުބާރާތެއް ބޭއްވުމަށެވެ.
