މާލޭގައި ބޭއްވުމަށް ހަމަޖެހިފައިވާ 20 އަހަރުން ދަށުގެ ސާފް ޗެމްޕިއަންޝިޕް ފުޓުބޯޅަ މުބާރާތުގެ މެޗުތަކުގެ ޓިކެޓު މިއަދު ވިއްކަން ފަށައިފި އެވެ.

މި މުބާރާތުގެ ޓިކެޓުތައް ވިއްކުމަށް ހަމަޖެހިފައިވަނީ ގަލޮޅު ރަސްމީ ދަނޑުގެ ޓިކެޓު ކައުންޓަރުންނާއި ސޯޝަލް ސެންޓަރުންނެވެ. ދަނޑުން ޓިކެޓު ވިއްކަމުންދާނީ މަޖީދީމަގަށް ވާގޮތަށް ހުންނަ 2 ނަމްބަރު ގޭޓުންނެވެ. ޓިކެޓުގެ އަގުތަކަށް ބަލާއިރު، ސިޑިބަރީގެ ޓިކެޓެއް ވިއްކަނީ 15 ރުފިޔާއަށެވެ. އަދި ގޮނޑިބަރީގެ ޓިކެޓެއް ވިއްކުމަށް ހަމަޖެހިފައިވަނީ 20 ރުފިޔާއަށެވެ.

ޓިކެޓު ވިއްކަން ފެށިއިރު، މުބާރާތުގައި ވާދަކުރާ ގައުމީ ޓީމުތައް މިއަދު ވަނީ ރާއްޖެ އަންނަން ފަށާފައެވެ. އެންމެ ފުރަތަމަ ރާއްޖެ އައީ ސްރީލަންކާގެ ޓީމެވެ. އިންޑިއާ ފިޔަވައި މުބާރާތުގައި ވާދަކުރާ އެހެން ހުރިހާ ޓީމުތަކެއް މިއަދު ރާއްޖެ އައުމަށް ވަނީ ހަމަޖެހިފައެވެ. އިންޑިއާ ޓީމު ރާއްޖެ އައުމަށް ހަމަޖެހިފައިވަނީ މި މަހުގެ 23 ވަނަ ދުވަހުއެވެ.

މި ފަހަރުގެ ސާފް ޗެމްޕިއަންޝިޕްގައި ރާއްޖެ ހިމެނެނީ ގްރޫޕް 'އޭ' ގައެވެ. ރާއްޖެއާއެކު މި ގްރޫޕްގައި ދެން ހިމެނެނީ ސްރީލަންކާ، ނޭޕާލް އަދި ބޫޓާނެވެ. މާލޭގައި މި މުބާރާތް ބޭއްވުމަށްޓަކައި ވާންޖެހޭ އެންމެ ފަހުގެ ތައްޔާރީތައް މިހާރު ދަނީ ކުރެވެމުންނެވެ.

މި މުބާރާތުގެ ގްރޫޕް ބީގައި ހިމެނެނީ އެންމެ ފަހުގެ ޗެމްޕިއަން ބަންގްލަދޭޝްގެ އިތުރުން އިންޑިއާ އަދި ޕާކިސްތާނެވެ.

ދިވެހިރާއްޖެ ކުޅޭ ފުރަތަމަ މެޗުގައި ނުކުންނާނީ ސްރީލަންކާއާ ދެކޮޅަށެވެ. މި މެޗު ކުޅުމަށް ހަމަޖެހިފައިވަނީ 23 ވަނަ ދުވަހުގެ ރޭގަނޑެވެ. މުބާރާތުގެ ތާވަލު ތަރުތީބުވެފައިވާ ގޮތުން، ރާއްޖެ ކުޅޭ ދެވަނަ މެޗުގައި މި މަހުގެ 25 ވާ އާދިއްތަ ދުވަހުގެ ރޭ ބޫޓާނާ ދެކޮޅަށް ނުކުންނައިރު، ގްރޫޕް ސްޓޭޖުގެ ފަހު މެޗުގައި ރާއްޖެ ބައްދަލުކުރާނީ ނޭޕާލާ އެވެ. އެ މެޗު އޮންނާނީ މި މަހުގެ 27 ވާ އަންގާރަ ދުވަހުގެ ރޭގަނޑެވެ.

ސާފް ޗެމްޕިއަންޝިޕްގެ ފައިނަލް މެޗު ކުޅުމަށް ތާވަލުކޮށްފައިވަނީ އަންނަ އޭޕްރީލް މަހުގެ 3 ވަނަ ދުވަހު އެވެ.