ޔުއެފާ ޗެމްޕިއަންސް ލީގުގައި އާސެނަލް އަތުން ބަލިވެ އަދި ކިއެއްތަ، މުބާރާތުން ކެޓިޔަސް، އެއީ އޭނާ ކޯޗުކަމުން ވަކިވާންޖެހޭނެ ސަބަބެއް ނޫން ކަމަށް ރިއަލް މެޑްރިޑުގެ ކޯޗު ކާލޯ އަންޗެލޮޓީ ބުނެފިއެވެ. އަންޗެލޮޓީ މިހެން ބުނީ އާސެނަލްގެ ދަނޑުގައި ހުސްވި ހަފުތާގައި ކުޅުނު މެޗުން 3-0 ގެ ނަތީޖާއިން ބަލިވުމާއި ގުޅިގެންނެވެ.

"އަހަރެން ދެކޭ ގޮތުގައި މި މެޗަކީ އަހަރެންގެ ފަހު މެޗަށް ވާންޖެހޭ ސަބަބެއްނެތް. އަދި އަހަރެން ނުދެކެން އާސެނަލް މެޗުގެ ސަބަބުން އަހަރެންގެ ކުރިމަގަށް ހުރަސް އެޅިދާނެ ކަމަށް،" އަންޗެލޮޓީ ބުނެފައިވެއެވެ.

އަންޗެލޮޓީއަކީ ޗެމްޕިއަންސް ލީގު އެންމެ ގިނައިން ކާމިޔާބުކޮށްފައިވާ ކޯޗެވެ. އޭނާ ވަނީ ރިއަލް މެޑްރިޑާއެކު ތިން ފަހަރު އަދި އޭސީ މިލާނާއެކު ދެ ފަހަރު މި މުބާރާތް ކާމިޔާބުކޮށްފައެވެ. އަންޗެލޮޓީ ބުނެފައިވަނީ އާސެނަލްއާ ދެކޮޅަށް ނާޒުކު ފައްތަރެއްގައި އޮވެ ކުޅޭ މެޗާމެދު އޭނާ ވިސްނަނީ ވަރަށް ޕޮޒިޓިވްކޮށް ކަމަށެވެ.

"މިއީ އަހަރެން ބޮޑު މެޗަކަށް ނުކުންނަ ފުރަތަމަ ފަހަރެއް ނޫން. އަދި އަހަރެން އުއްމީދު ކުރާ ގޮތުގައި އަހަރެން ބޮޑު މެޗަކަށް ނުކުންނަ ފަހު ފަހަރަށް ވެސް ނުވާނެ. އަހަރެން މިހުރީ އިސް އުފުލައިގެން. އަހަރެންގެ ހިތްވަރު ހުންނާނެ،" އަންޗެލޮޓީ ބުނެފައިވެއެވެ.

ނަމަވެސް، ސްޕޭނުގެ ބައެއް މީޑިއާތަކުން ބުނެފައިވަނީ ޗެމްޕިއަންސް ލީގު ކާމިޔާބު ނުކުރެވިއްޖެނަމަ މި ސީޒަނަށް ފަހު ރެއާލްގެ ކޯޗުކަމުން އަންޗެލޮޓީ ވަކިކަކިކުރާނެ ކަމަށެވެ. އެހެންނަމަވެސް، އަންޗެލޮޓީ އުއްމީދު ކުރަނީ އޭނާއާއެކު ރެއާލްއިން ހަދާފައިވާ ކޮންޓްރެކްޓްގައި ބާކީ އޮތް އެއް އަހަރު ކޯޗުކޮށްދޭން އޭނާއަށް ލިބޭނެ ކަމަށެވެ.

މިމަހުގެ 8 ވަނަ ދުވަހު، އެމިރޭޓްސް ސްޓޭޑިއަމްގައި ކުޅުނު ކުއާޓާ ފައިނަލްގެ ފުރަތަމަ ލެގުގައި އާސެނަލް އަތުން 3-0 އިން ބަލިވިއިރު، ދެވަނަ ލެގު އޮތީ މިރޭ ސަންޓިއާގޯ ބާނަބޯ ސްޓޭޑިއަމްގައެވެ.