ދުންފަތުގެ އިސްތިއުމާލުން ދުރުކުރުމަށް “ޖެނެރޭޝަނަލް ބޭން” ކަނޑައެޅުމާއިމެދު ގޮތެއް ނިންމެވުމަށް މިއަދު ހަވީރު ވަޒީރުންގެ މަޖިލީހުގެ ބައްދަލުވުމެއް ބާއްވައި އެކަމާއި ގުޅިގެން މަޝްވަރާ ކުރައްވާނެ ކަމަށް ރައީސުލްޖުމްހޫރޮއްޔާގެ އޮފީހުން ބުނެފިއެވެ.
ދުންފަތާއި މަސްތުވާ ތަކެއްޗަށް ދެވި ހިފަމުންދާ ޒުވާނުން އިޞްލާޙް ކޮށް ރައްޔިތުންގެ ޞިއްޙަތު ރައްކާތެރިކުރުމުގެ މާތް ޢަޒުމްގައި ރައީސް ޑރ. މުޙައްމަދު މުޢިއްޒު ވަނީ ދުންފަތާއި ދެކޮޅަށް ޚާއްޞަ ކެމްޕޭނުތައް ފަށްޓަވާފައެވެ. އެގޮތުން ވަކި ޢުމުރެއްގެ ބަޔަކަށް ދުންފަތުގެ ބާވަތްތައް މަނާ ކުރުމަށް އެމަނިކުފާނު ވަނީ ސޯބަލް މީޑިއާގައި ރައްޔިތުންގެ ޚިޔާލު ވެސް ހޯއްދަވާފައެވެ.
ދުންފަތް މަނާކުރުމަށް ރައީސް ވަނީ 3 ޗޮއިސް އެއް ދެއްވައި އެކަމަށް ޢާންމުންގެ ޚިޔާލަށް އެދިވަޑައިގެންފައެވެ.
ރައީސް ހުށަހަޅުއްވާފައިވާ ތިން ގޮތަކީ 2000ވަނަ އަހަރުން ފެށިގެން އުފަންވެފައިވާ ކުދިންނަށް (25 އަހަރުން ދަށުގެ އުމުރުފުރާ) ނުވަތަ 2004ވަނަ އަހަރުން ފެށިގެން އުފަންވެފައިވާ ކުދިންނަށް (21 އަހަރުން ދަށުގެ އުމުރުފުރާ) ނުވަތަ 2007 ވަނަ އަހަރުން ފެށިގެން އުފަންވެފައިވާ ކުދިންނަށް (18 އަހަރުން ދަށުގެ އުމުރުފުރާ) ދުންފަތް މަނާކުރާގޮތަށް ކަނޑައެޅުމެވެ.
މި ޕޯލާއި ގުޅިގެން ރައްޔިތުންގެ ތެރެއިން ގިނަ ބަޔަކު ތާއީދު ކޮށްފައި ވަނީ 2000 ވަނަ އަހަރުން ފެށިގެން އުފަންވެފައިވާ ކުދިންނަށް ދުންފަތް މަނާކުރުމެވެ.
