ފަހު ވަގުތު ރުޑިގާ ޖަހައިދިން ގޯލުން ސްޕެނިޝް ކަޕުގެ ފައިނަލުގެ ޖާގައެއް ރިއަލް މެޑްރިޑުން ހޯދައިފިއެވެ.

ފައިނަލުގެ ޖާގަ ރިއަލް އިން ކަށަވަރުކުރީ، ރޭ ސެމީ ފައިނަލުގެ ދެވަނަ ލެގުގައި ރެއާލް ސޮސިއެޑާޑާ ދެކޮޅަށް ކުޅުނު މެޗު 4-4 ގެ ނަތީޖާއަކުން އެއްވަރުކޮށް، 5-4 ގެ އެގްރިގޭޓް ނަތީޖާއަކުން ކުރި ހޯދައިގެންނެވެ.

ސެމީ ފައިނަލުގެ ފުރަތަމަ ލެގުގައި ސޮސިއެޑާޑްގެ ދަނޑުގައި ކުޅުނު މެޗު 1-0 ގެ ނަތީޖާއަކުން ކާމިޔާބުކޮށްފައިވަނީ ރިއަލް އެވެ. އަދި ރޭ ސެންޓިއާގޯ ބާނަބެއު ސްޓޭޑިއަމްގައި ކުޅުނު މެޗުގެ ފުރިހަމަ ވަގުތު ހަމަވިއިރު 4-3 ގެ ނަތިޖާއަކުން ސޮސިއެޑާޑް ކުރި ހޯދުމާއެކު، މެޗުގެ އެގްރިގޭޓް ނަތީޖާ ވަނީ އެއްވަރުވެފައެވެ. އެހެންކަމުން މި މެޗުގެ ނަތީޖާ ނެރެފައިވަނީ އިތުރު ވަގުތުގެ ކުޅުމުގައެވެ.

ރޭ ފުރަތަމަ ގޯލު ޖެހީ ވެސް ރެއާލް ސޮސިއެޑާޑުންނެވެ. އެއީ މެޗުގެ 16 ވަނަ މިނެޓުގައި އެންޑާ ބަރެނޭޗާ އެވެ.

އޭގެފަހުން މެޑްރިޑުން ގޯލެއް ޖެހިއެވެ. މި ގޯލު ޖެހީ އެންޑްރިކް (30 ވަނަ މިނެޓް) ގައެވެ. ދެން ފެނުނީ ޑޭވިޑް އަލަބާއަތުން ބައިކޮޅަށް 72 ވަނަ މިނެޓުގައި ގޯލެއް ވަންތަނެވެ. އޭގެ 8 މިނެޓް ފަހުން އިތުރު ގޯލެއްވެސް ސޮސިއެޑާޑުން ޖެހިއެވެ. އެ ގޯލް ޖެހީ މިކޭލް އޮޔާޒަބާލް އެވެ.

ނަމަވެސް ޖޫޑް ބެލިންހަމް ވަނީ އޭގެ ދެމިނެޓް ފަހުން، 82 ވަނަ މިނެޓުގައި ގޯލެއް ޖަހާފައެވެ އަދި އައުރެލިއަން ޗުއަމެނީ 86 ވަނަ މިނެޓްގައި އިތުރު ގޯލެއް ޖެހިއެވެ.

މި މެޗުގައި ސޮސިއެޑާޑްގެ މިކޭލް އޮޔަޒަބާލް އޭނާގެ ދެވަނަ ގޯލް 108 ވަނަ މިނެޓިގައި ޖެހިއިރު ރިއަލް މެޑްރިޑަށް މެޗުގެ އެންމެ ފަހު ވަގުތު ގޯލު ޖަހައި ހިތްހަމަޖެހުން ގެނެސްދީ 115 ވަނަ މިނެޓްގައި އެންޓޯނިއޯ ރުޑިގާ އެވެ.

މި ކާމިޔާބީއާއެކު ރެއާލް މެޑްރިޑަށް މި ސީޒަނުގައި ތިން މުބާރާތް ކާމިޔާބުކުރުމުގެ ފުރުސަތު އަދިވެސް އެބައޮތެވެ. އެއީ ސްޕެނިޝް ކަޕާއި، ސްޕެނިޝް ލީގާ އަދި ޔުއެފާ ޗެމްޕިއަންސް ލީގެވެ.

ފައިނަލުގައި ރެއާލް މެޑްރިޑާ ދެކޮޅަށް ކުޅޭނެ ޓީމު އެނގޭނީ ބާސެލޯނާ އާއި އެތުލެޓިކޯ މެޑްރިޑް ބައްދަލުކުރާ ސެމީ ފައިނަލްގެ ދެވަނަ ލެގަށްފަހުގައެވެ.