ސްޕެނިޝް ލަލީގާގައި އެމްބާޕޭގެ ދެ ގޯލާއެކު ރިއަލް މެޑްރިޑުން ލެގާނެސް މައްޗަށް 3-2 ގެ ނަތީޖާއަކުން ކުރި ހޯދައިފިއެވެ.

ހޮނިހިރު ދުވަހުގެ ރޭ މެޑްރިޑުގެ ދަނޑުގައި ކުޅުނު މި މެޗުގެ ފުރަތަމަ ހާފުގެ 30 ވަނަ މިނެޓުގައި ލެގާނެސްގެ ގޯލު އޭރިއާ ތެރެއިން އެޓީމުގެ އޮސްކާ ރޮޑްރިގޭޒް، އަރްދާ ގުލާ އަށް ކުރި ފައުލަކާ ގުޅިގެން މެޑްރިޑަށް ޕެނަލްޓީއެއް ލިބުނެވެ. ހިތްގައިމު ޕެނެންކާ ޕެނަލްޓީއެއް ގޯލަށް ވައްދާލާ މެޗުގެ ފުރަތަމަ ގޯލު ކާމިޔާބުކުރީ އެމްބާޕޭއެވެ.

ނަމަވެސް އޭގެ މިނެޓެއް ފަހުން މެޑްރިޑުގެ ޑިފެންސް ލައިނުން ހެދި ގޯހެއްގައި ލެގާނެސް އިން ވަނީ ނަތީޖާ ހަމަހަމަ ކޮށްފައެވެ. މި ގޯލު އެޓީމަށް ކާމިޔާބު ކޮށްދިނީ ފޯވާޑު ޑިއޭގޯ ގާސިއާ އެވެ. އަދި ފުރަތަމަ ހާފު ނިމެން 4 މިނެޓަށް ވެފައި އިންދާ ޑެނިއަލް ރަބާ ވަނީ ގޯލެއް ޖަހައި މެޑްރިޑް ހާސްކަމެއްގެ ތެރެއަށް ވައްޓާލާފައެވެ.

ދެވަނަ ހާފު ފަށައިގެން 2 ވަނަ މިނެޓުގައި ބެލިންގހަމް ވަނީ ގޯލެއް ޖަހައި ނަތީޖާ ހަމަހަމަ ކޮށްދީފައެވެ. މި ގޯލު އޭނާ ކާމިޔާބު ކުރީ ބްރަހިމް ޑިއަޒް ގޯލަށް ފޮނުވާލި ހަމަލާއެއް ލެގާނެސްގެ ޑިފެންޑަރެއް އެ ބޯޅަ ގޯލަށް ނުވައްދާ ދިފާއުކުރުމުން ގޯލުގެ މަތީ ދަނޑީގައި ޖެހި ކުޅުމުގެ ތެރެއަށް ބޯޅަ ވަދެ ބެލިންގހަމްގެ ފޮނުވާލި ހަމަލާ ގޯލަށް ވަދެގެންނެވެ.

ހޫނު ފެނަށް ވެއްޓިފައިވާ މެޑްރިޑަށް ފިނިކަމެއް ލިބުނީ 76 ވަނަ މިނެޓުގައި އޭރިއާ ބޭރުން އެޓީމަށް ލިބުނު ހިލޭ ޖެހުމެއް އެމްބާޕޭ ގޯލަށް ވައްދާލައިގެންނެވެ.

^{ހިލޭ ޖެހުމެއް ގޯލަށް ވައްދާލައި އެމްބާޕޭ ވަނީ މެޗުގެ ނަތީޖާ މެޑްރިޑްގެ ކޮޅަށް އަނބުރާލާފައި. / ފޮޓޯ: ރިއަލް މެޑްރިޑް}

މި މޮޅާއެކު ޕޮއިންޓުގެ ގޮތުން ރިއަލް މެޑްރިޑް ބާސެލޯނާއާ އެއްވަރުވި ނަމަވެސް ގޯލުގެ ތަފާތުން ތާވަލުގެ އެއްވަނައިގައި އޮތީ ބާސެލޯނާ އެވެ. ބާސެލޯނާ އެއްވަނައިގައި އޮތީ މެޑްރިޑަށް ވުރެ އެއްމެޗު މަދުން ކުޅެގެންނެވެ. އަދި ލަލީގާގެ ޤަވާއިދުގައިވާ ގޮތުން ސީޒަން ނިމޭއިރު ޕޮއިންޓުގެ ގޮތުން ދެޓީމު އެއްވަރު ވެއްޖެނަމަ ފުރަތަމަ ބަލާނީ ހެޑް-ޓު-ހެޑް އަށެވެ. އެހެން ކަމުން މިހާރު އޮތްގޮތުން ނަމަ އެޑްވާންޓޭޖް އޮތީ ބާސެލޯނާ އަށެވެ. އެއީ ސީޒަނުގެ ފުރަތަމަ ހާފުގައި މެޑްރިޑް-ބާސެލޯނާ ބައްދަލުކުރި މެޗު ބާސެލޯނާ ވަނީ 5-2 ގެ ނަތީޖާއަކުން ކާމިޔާބުކޮށްފައެވެ. މި ދެޓީމު ލީގުގައި ދެން ބައްދަލުކުރާނީ އަންނަ މެއި މަހުގެ 6 ވަނަ ދުވަހުއެވެ.