ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅާ އެއްގޮތަށް، ހއ. ކެލާގެ ފަޅުގައި 2 ރިސޯޓު ތަރައްޤީކުރުމަށްޓަކައި، އެ ރަށުގެ ފަޅުތެރެއިން ބިން ކަނޑައެޅުއްވުމަށް އެމަނިކުފާނު ނިންމަވައިފިއެވެ.

ރައީސް ނިންމަވާފައިވަނީ ކެލާ ފަޅުގައި ރިސޯޓު ތަރައްޤީކުރުމަށް އެ ރަށުގެ ފަޅުތެރެއިން ޖުމުލަ 325.5 ހެކްޓަރު ބިން ކަނޑައެޅުމަށެވެ. މި ނިންމެވުމަކީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުގެ ދަށުން ރައީސުލްޖުމްހޫރިއްޔާއަށް ލިބިވަޑައިގަންނަވާ ބާރުގެ ދަށުން ނިންމަވާފައިވާ ނިންމެވުމެކެވެ.

މިދިޔަ އަހަރުގެ ފެބްރުއަރީ މަހު ހއ. ކެލާއަށް ރައީސް ކުރެއްވި ދަތުރުފުޅެއްގައި، އެ ރަށުގެ ފަޅުތެރޭގައި ރިސޯޓެއް އަދި ރަށުގައި ދަނޑުވެރިކަމުގެ މަޝްރޫޢެއް ހިންގަވާނެކަމުގެ ޔަޤީންކަން ވަނީ ދެއްވާފައެވެ. އޭރު ރައީސް ވިދާޅުވެފައިވަނީ ކެލާއަކީ ފަތުރުވެރިކަން ފުޅާކުރެވޭނެ ފުރުޞަތު އޮތް ރަށެއް ކަމަށާއި، އެ ސަރަޙައްދުގެ ޒުވާނުންނަށްވެސް އޭގެ ސަބަބުން ވަޒީފާގެ ފުރުޞަތުތައް ލިބިގެންދާނެ ކަމަށެވެ.

މީގެ އިތުރުން، ކެލާގައި ދަނޑުވެރިކަން ފުޅާކުރުމަށް ޚާއްޞަ ޕްރޮގްރާމެއް ހިންގަވައިދެއްވާނެ ކަމަށްވެސް ރައީސް ވަނީ ވިދާޅުވެފައެވެ. ރާއްޖޭގައި އުފައްދާ ބާވަތްތައް ރިސޯޓްތަކަށް ސަޕްލައިކުރެވޭނެ ނިޒާމެއް ޤާއިމުކުރުމަކީ ސަރުކާރުގެ މުހިންމު އަމާޒެއް ކަމަށް ރައީސް ވިދާޅުވެފައިވެއެވެ.

ކެލާ ފަޅުތެރޭގައި ރިސޯޓު ތަރައްޤީކުރުމާ ގުޅޭގޮތުން ފަތުރުވެރިކަމާ ބެހޭ ވުޒާރާއާއި ކެލާ ކައުންސިލާ ދެމެދު މިދިޔަ އަހަރުގެ އޭޕްރީލް 3 ވަނަ ދުވަހު ވަނީ އެއްބަސްވުމެއްގައި ސޮއިކޮށްފައެވެ.