ވޯލްޑް ކަޕް ކޮލިފައިންގައި އެކަށީގެންވާ ނަތީޖާ ނުނެރެވުމާއި ގުޅިގެން ބްރެޒިލްގެ ޤައުމީ ފުޓްބޯޅަ ޓީމުގެ ކޯޗުގެ މަގާމުން ޑޮރިވާލް ޖޫނިއާ ވަކިކޮށްފިއެވެ.

ޑޮރިވާލް ވަކިކުރީ ވޯލްޑް ކަޕް ކޮލިފައިންގައި އާޖެންޓީނާ އަތުން 4-1 އިން ބަލިވުމާ ގުޅިގެންނެވެ. މިއީ ބްރެޒިލް ކޮލިފައިންގ މެޗެއްގައި ލިބުނު އެންމެ ބޮޑު ބަލިވުމެވެ.

ޑޮރިވާލް ޖޫނިއާ ބްރެޒިލްގެ ކޯޗުކަމުގައި ހޭދަކުރީ ގާތްގަނޑަކަށް 14 މަސް ދުވަހެވެ. މި މުއްދަތުގައި ބްރެޒިލް ކުޅުނު މެޗުތަކުން ހަތް މެޗުން މޮޅުވެ، ހަތް މެޗު އެއްވަރުކޮށް، ދެ މެޗުން ބަލިވިއެވެ. މި މެޗުތަކުގައި ބްރެޒިލް ޖަހާފައިވަނީ 25 ގޯލެވެ.

ފަހަކަށް އައިސް ޓީމުގެ ފޯމު ދަށްވެ، އެންމެ ފަހުގެ ހަތަރު މެޗުން އެންމެ މެޗަކުން މޮޅުވެފައިވާއިރު، ބްރެޒިލް މިހާރު އޮތީ ދެކުނު އެމެރިކާގެ ކޮލިފައިން ތާވަލުގެ ފަސްވަނައިގައެވެ.

ބްރެޒިލްގެ ފުޓްބޯޅަ ފެޑެރޭޝަން (ސީބީއެފް)ގެ ރައީސް އެޑްނާލްޑޯ ރޮޑްރިގަސް މިހާރު ދަނީ އައު ކޯޗަކު ހޯދުމުގެ މަސައްކަތް ކުރަމުންނެވެ. މި މަޤާމަށް ގާތްކަމަށް ބެލެވޭ ބައެއް ކޯޗުންގެ ތެރޭގައި ރެއާލް މެޑްރިޑްގެ ކާލޯ އަންޗެލޮޓީ އާއި އަލްހިލާލްގެ ޖޯޖް ޖީސަސް ހިމެނެއެވެ. މި ދެ ކޯޗުންކުރެ ކޯޗަކު ހޮވިއްޖެ ނަމަ، އެއީ ބްރެޒިލްގެ ތާރީޚުގައި ފުރަތަމަ ފަހަރަށް ބޭރު ޤައުމެއްގެ ކޯޗަކު ހަވާލުވާ ފަހަރު ވާނެއެވެ. ބްރެޒިލްގެ ދެން އޮތް ކޮލިފައިން މެޗުތައް ކުޅޭނީ ޖޫން މަހު އެކުއަޑޯ އާއި ޕެރަގުއޭ އާ ދެކޮޅަށެވެ.

62 އަހަރުގެ ޑޮރިވާލް ބްރެޒިލްގެ ކޯޗުކަމާ ހަވާލުވީ މިދިޔަ އަހަރުގެ ޖެނުއަރީ މަހުގައެވެ. އޭނާގެ އިރުޝާދުގެ ދަށުން ބްރެޒިލް ކުޅުނު ފުރަތަމަ މެޗުގައި އިންގްލެންޑް އަތުން 1-0 އިން މޮޅުވިއެވެ.

ޑޮރިވާލްގވާލްގެ ކޯޗިންގ ކެރިއަރުގެ އެންމެ ބޮޑު ކާމިޔާބީއަކީ 2022 ވަނަ އަހަރު ފްލަމެންގޯއަށް ކޮޕަ ލިބެޓަޑޯރެސްގެ ތަށި ހޯދައިދިނުމެވެ.