ގަލޮޅުގައި ހުރި ގެއަކަށް ގޮސް ގެއްލުންދީ، އެ ގޭގެ ވެރިމީހާއަށް އިންޒާރުދީ ބިރުދެއްކި މައްސަލައިގައި ހައްޔަރުކުރި ހަތަރު މީހުންގެ ބަންދުގެ މުއްދަތު ކްރިމިނަލް ކޯޓުން އިތުރުކޮށްފިއެވެ.

މި މައްސަލައިގައި ހައްޔަރުކޮށްފައިވާ ހަތަރު މީހުންނަކީ:

- އއ. މާޅޮސް، ރީތިހިޔާގެ މުޙައްމަދު އަފްލާޙް (23 އަހަރު)

- ނ. ވެލިދޫ، އެލަސްގެ އިބްރާހިމް އަހްނަފް (21 އަހަރު)

- ނ. މަނަދޫ، ހަވޭލިގެ މުޙައްމަދު އަޒާން (23 އަހަރު)

- ތ. ގުރައިދޫ، ފަޒާގެ އަލީ ނަވާފު (21 އަހަރު)

މި ހަތަރު މީހުން ހައްޔަރުކޮށްފައިވަނީ މިމަހުގެ 8 ވަނަ ދުވަހުގެ ރޭގައެވެ. އޭގެ ފަހުން މާރިޗު 9 ވަނަ ދުވަހު ކްރިމިނަލް ކޯޓުން ވަނީ އެ މީހުންގެ ބަންދަށް 15 ދުވަސް ޖަހާފައެވެ. އެ މުއްދަތު ހަމަވުމާ ގުޅިގެން އިއްޔެ ކްރިމިނަލް ކޯޓުން ވަނީ އަނެއްކާވެސް އެ ހަތަރު މީހުންގެ ބަންދުގެ މުއްދަތު 15 ދުވަހަށް އިތުރުކޮށްފައެވެ. މި އިތުރުކުރި މުއްދަތު ހަމަވާނީ އޭޕްރީލް 7، 2025 ގައެވެ.

މި މައްސަލައިގައި ހައްޔަރުކުރެވުނު ހަތަރު މީހުން ވެސް ބުނެފައިވަނީ އެ މީހުން އެ ގެއަށް ދިޔައީ އަތޫފް ކިޔާ ރައްޓެހިއެއްގެ އެދުމުގެ މަތިން، އެ ގެ ސާފުކޮށްދިނުމަށް ކަމަށެވެ. އަދި އެ ގެއަށް ގެއްލުންދިން ކަމަށް ކުރާ ތުހުމަތުތަކަށް އެ މީހުން ވަނީ އިންކާރުކޮށްފައެވެ.

ނަމަވެސް، ފުލުހުންގެ ތަޙުޤީޤަށް ހާމަވެފައިވާ ގޮތުގައި އެ ގެ ކުއްޔަށް ދީފައިވަނީ އަލީ ޝިމާން ރަޝީދު ނަމަކަށް ކިޔާ މީހަކަށް ކަމަށާއި، އެ އެއްބަސްވުމުގައި ސޮއިކުރުވާފައިވަނީ ގަދަކަމުން ކަމަށް ގޭގެ ވެރިފަރާތުން ބުނެފައިވެއެވެ. އަދި އެ ހަތަރު މީހުންނާއެކު އެ ގެއަށް ދިޔަ މީހާގެ އަތުގައި އޮތް އެއްބަސްވުމަކީ ސައްޙަ އެއްބަސްވުމެއް ނޫންކަމަށް ފުލުހުން ވަނީ ފާހަގަކޮށްފައެވެ.

މި މައްސަލައިގައި އެ ހަތަރު މީހުންގެ މައްޗަށް ކުރަނީ ބިރުދެއްކުމާއި، ޖަމާޢަތް ހަދައިގެން ހުއްދަނެތި ތަންތަނަށް ވަނުމާއި، މުދަލަށް ގެއްލުން ދިނުމުގެ ތުހުމަތެވެ. އަދި މި ހަތަރު މީހުންނަކީ ވެސް ކުރިން ބަންދުގެ ރެކޯޑު އޮތް ބައެއްކަން ކޯޓު އަމުރުން އެނގެއެވެ.