ރައީސް ޑރ. މުހައްމަދު މުއިއްޒު. ކުރީގެ ޕޮލިސް ކޮމިޝަނަރު އަހުމަދު ފަސީހު އިމިގްރޭޝަން ކޮންޓްރޯލަރުގެ މަޤާމަށް އައްޔަންކުރައްވައިފިއެވެ. ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވި ގޮތުގައި ފަސީހު މި މަޤާމަށް އައްޔަންކުރެވިފައިވަނީ ސްޓޭޓް މިނިސްޓަރ ފެންވަރުގައެވެ.

އަހުމަދު ފަސީހަކީ ކުރީގެ ރައީސް މުހައްމަދު ނަޝީދުގެ ވެރިކަމުގައި ކޮމިޝަނަރ އޮފް ޕޮލިސްގެ މަޤާމު އަދާކުރެއްވި ބޭފުޅެކެވެ. 2012 ވަނަ އަހަރު ރައީސް ނަޝީދު އިސްތިއުފާ ދެއްވި އިރުވެސް އޭނާ ހުންނެވީ މި މަޤާމުގައެވެ. ފަސީހު ވަނީ 23 އަހަރުގެ ޚިދުމަތަށްފަހު ހަމަ އެ އަހަރު ފުލުހުންގެ ޚިދުމަތުން ރިޓަޔަރ ކުރައްވާފައެވެ.

އޭގެ ފަހުން ފަސީހު ވަނީ އެމްޓީސީސީގެ ޑެޕިއުޓީ ސީއީއޯގެ މަޤާމު ފުރުއްވާފައެވެ. އަދި ނިމިދިޔަ އެމްޑީޕީގެ ވެރިކަމުގައި އޭނާ ވަނީ ޕޮލިސް ބޯޑަށްވެސް އައްޔަންކުރެވިފައެވެ.

އިމިގްރޭޝަން ކޮންޓްރޯލަރުގެ މަޤާމު ހުސްވެފައިވަނީ އެ މަޤާމުގައި ހުންނެވި މުހައްމަދު ޝަމްއާން ވަހީދު އެ މަޤާމުން ވަކިކުރެއްވުމާއި ގުޅިގެންނެވެ. ޝަމްއާން ވަކިކުރެއްވި ސަބަބެއް ސަރުކާރުން ހާމަކުރައްވާފައެއް ނުވެއެވެ.