ސުޕްރީމް ކޯޓުގެ ކުރީގެ ފަނޑިޔާރު ސ. މީދޫ ހަސަންކާރިގޭ ހުސްނުއްސުޢޫދު އަށް ކުރީގެ ޕްރޮސެކިއުޓަރ ޖެނެރަލް އަދި ކުރީގެ ފަނޑިޔާރު މުހުތާޒު މުހުސިން ވަރަށް ބޮޑަށް ފާޑު ވިދާޅުވެއްޖެއެވެ.
ސީދާ ހުސްނުއްސުޢޫދުގެ ނަން ޖެއްސެވުމުގެ ބަދަލުގައި މުހުތާޒް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ވިދާޅުވެފައިވަނީ ފަނޑިޔާރުން ސިޔާސީ ފަރާތްތަކަށް ޖަވާބުދާރީވެ، އާންމު ބަޔާންތައް ނެރުމަކީ ރައްޔިތުންގެ ހިތުގައި ފަނޑިޔާރުގެއާ ދޭތެރޭ އޮންނަ ގަދަރާއި ކަރާމާތް ކެނޑި، ނުތަނަވަސްކަން އިތުރުވެގެންދާނެ ކަމެއް ކަމަށެވެ. އޭނާ މިހެން ވިދާޅުވީ ހުސްނުއްސުޢޫދު ފަނޑިޔާރުކަމުން އިސްތިއުފާ ދިނުމުގެކުރިން، އިސްތިއުފާގެ ވާހަކަ ބަޔާންކޮށް ފަނޑިޔާރުންގެ ޤާނޫނުން ބޭރުން ސިޔާސީ ބަޔާނެއް ނެރެފައިވާ ދަނޑިވަޅެއްގައެވެ.
ފަނޑިޔާރުކަމުން ވަކިވެވޭނީ އެކަން ބަޔާންކޮށް ޖުޑީޝަލް ސާވިސް އަށް ސިޓީ ހުށަހަޅައިގެންނެވެ. ނަމަވެސް އެކަން އެ މަގުން ކުރުމުގެ ބަދަލުގައި ސުޢޫދު ޢަމަލުކުރެއްވީ ޤާނޫނު އަސާސީގައި ނުހިމެނޭ ވާހަކަތަކެއް އޭގައި ހިމެނޭ ކަމަށް ބުނެ ނުބައި ނަމްބަރުތައް ޖައްސަވައިގެން ސިޔާސީ ބަޔާނެއް ނެރެގެންނެވެ.
"އިއްޒަތްތެރި ފަނޑިޔާރުންނަށް ޤާނޫނު ބުނާގޮތުން ޖަވާބުދާރީވާން އޮންނަނީ ގަދަރުވެރިކަމާއެކު ޖޭއެސްސީއަށެވެ. މަޤާމުގައި ތިއްބަވައިގެން ސިޔާސީ ފަރާތްތަކަށް ޖަވާބުދާރީވެ، އާންމު ބަޔާންތައް ނެރުއްވުމުން ގެންދެވުމަކީ، ރައްޔިތުންގެ ހިތުގައި ފަނޑިޔާރުގެއާ ދޭތެރޭ އޮންނަ ގަދަރާއި ކަރާމާތް ކެނޑި، ނުތަނަވަސްކަން އިތުރުވެގެންދާނެ ކަމެއް ކަމަށް ދެކެމެވެ،" މުހުތާޒު އެމަނިކުފާނުގެ ފޭސްބުކްގައި ލިޔުއްވިއެވެ.
ސުޢޫދު އިސްތިއުފާ ދެއްވާފައިވަނީ އޭނާއާ ގުޅޭ މައްސަލަތަކެއް ޖުޑީޝަލް ސަރވިސް ކޮމިޝަން (ޖޭއެސްސީ) އިން ބަލަމުންދަނިކޮށެވެ. އޭގެ ތެރޭގައި ސުޢޫދުގެ ޢާއިލީ ބޭފުޅެއްގެ މައްސަލަ ސުޕްރީމް ކޯޓުގެ ބެންޗުގެ އިސްފަނޑިޔާރަކަށް ސުޢޫދު އިންނަވައިގެން ބެއްލެވި މައްސަލައާއި، ސުޢޫދުގެ ކުރީގެ މުވައްކިލެއްގެ މައްސަލަ ސުޢޫދު ފަނޑިޔާރެއްގެ ހައިސިއްޔަތުން ބެއްލެވި މައްސަލަ އާއި އިތުރު އެހެން މައްސަލަތައް ވެސް ހިމެނެއެވެ.
ޤާނޫނީ މާހިރުން ފާހަގަކުރާ ގޮތުގައި، ސުޢޫދުގެ އިސްތިއުފާގެ ސިޓީގައި ޤާނޫނުއަސާސީގައި ލިޔެފައި ނެތް އެއްޗަކާ ހަވާލާދީފައިވުމާއި، އިސްތިއުފާގެ ސިޓީ ފޮނުވާފައިވަނީ ރައީސުލްޖުމްހޫރިއްޔާއަށް ކަމަށްވުމަކީ ސުޢޫދުގެ ޤާނޫނީ ޢިލްމާމެދު ސުވާލު އުފެދޭ ކަމެކެވެ.
ސުޢޫދުގެ ފަނޑިޔާރުކަމާ ގުޅޭގޮތުން ކުރިން ވެސް ސުވާލުތަކެއް އުފެދިފައިވެއެވެ. އޭގެ ތެރޭގައި އޭނާގެ ސިޔާސީ ހަރަކާތްތަކާއި، ފަނޑިޔާރުކަމަށް އައްޔަންކުރެވުނު ގޮތާމެދު ސުވާލު އުފެދިފައިވާކަން ފާހަގަކުރެވެއެވެ.
