ބައެއް ރަށްތަކަށް މިއަދު ކެރީގެ އަސަރު ފޯރާނެ ކަމަށް މޫސުމާއި ބެހޭ ޤައުމީ އިދާރާ (މެޓް) އިން ލަފާކޮށްފިއެވެ.

މެޓުން ނެރުނު މޫސުމީ ލަފާގައި ބުނެފައިވަނީ ދެކުނުގެ އަތޮޅުތަކަށް ހުޅަނގާއި ހުޅަނގު އުތުރުން އަދި އެހެން ހިސާބުތަކަށް ހުޅަނގުއުތުރާއި އުތުރުން ގަޑިއަކު 8 މޭލާއި 18 މޭލާ ދެމެދުގެ ބާރުމިނުގައި ވައި ޖެހޭނެ ކަމަށެވެ.

ކަނޑުތައްވެސް އާދައިގެ ވަރަކަށް ގަދަވާނެ ކަމަށް މެޓުން ވަނީ ލަފާކޮށްފައެވެ.

މެޓުން ބުނީ ރާޅުގެ އުސްމިން ހުންނާނީ 2 ފޫޓާއި 5 ފޫޓާއި ދެމެދުގައި ކަމަށެވެ.

މެޓުގެ ތަފާސްހިސާބުތައް ދައްކާ ގޮތުން ފާއިތުވި 24 ގަޑިއިރު އެންމެ ގިނައިން ވާރޭ ވެހިފައިވަނީ ހދ. ކުޅުދުއްފުއްޓަށެވެ. އެގޮތުން އެ ރަށަށް 31.7 މިލިމީޓަރުގެ ވާރޭ ވަނީ ވެހިފައެވެ. ދެވަނަ އަށް އެންމެ ގިނައިން ވެހުނު ހދ. ހަނިމާދޫއަށް ވެހިފައިވަނީ 21.2 މިލިމީޓަރުގެ ވާރެއެވެ. އަދި ތިންވަނައަށް އެންމެ ގިނައިން ވެހުނު ހއ. ކެލާއަށް ވެހިފައިވަނީ 10.0 މިލިމީޓަރުގެ ވާރެއެވެ.