މޫސުމާ ބެހޭ ޤައުމީ އިދާރާ (މެޓް)އިން މިއަދު އާންމުކުރި މޫސުމީ ލަފާގައި، މިރޭ ވެސް ރާއްޖޭގެ ގިނަ ސަރަޙައްދުތަކަށް މޫސުން ގޯސްވާނެ ކަމަށް ބުނެފިއެވެ.

މާދަމާ ހެނދުނު 6:00 އަށް ލަފާކުރާ ގޮތުގައި، އުތުރުގެ ބައެއް ރަށްތަކަށް ވިއްސާރަކުރުމާއެކު ގުގުރުމުގެ ފުރުޞަތު އޮތް ކަމަށް މެޓުން ބުންޏެވެ. މީގެ އިތުރުން، މެދުރާއްޖެތެރެއާއި ދެކުނުގެ ބައެއް ރަށްތަކަށް ކެރީގެ އަސަރު ފޯރާނެ ކަމަށް ވެސް މެޓުން ލަފާކޮށްފައިވެއެވެ.

ދެކުނުގެ އަތޮޅުތަކަށް ހުޅަނގާއި ހުޅަނގު އުތުރުން އަދި އެހެން ހިސާބުތަކަށް ހުޅަނގު އުތުރާއި އުތުރުން ގަޑިއަކު 10 މޭލާއި 20 މޭލާ ދެމެދުގެ ބާރުމިނުގައި ވައި ޖެހޭނެ ކަމަށް މެޓުން ބުންޏެވެ. އަދި ކަނޑުތައް އާދައިގެ ވަރަކަށް ގަދަވެ، ރާޅުގެ އުސްމިން 3 ފޫޓާއި 6 ފޫޓާ ދެމެދުގައި ހުންނާނެ ކަމަށް މެޓުން ފާހަގަކުރިއެވެ.

ރާއްޖޭގެ އެކި ހިސާބުތަކަށް އިއްޔެ ވަނީ ވަރަށް ބޮޑަށް ވިއްސާރުކޮށް، ގިނަ ރަށްތަކެއްގައި ފެންބޮޑުވެ، ގެތަކަށް ވެސް ގެއްލުން ލިބިފައެވެ. މި ޙާލަތާ ގުޅިގެން، ރައްޔިތުންނަށް ސަމާލުވުމަށާއި ރައްކާތެރިކަމުގެ ފިޔަވަޅުތައް އެޅުމަށް ކަމާބެހޭ އިދާރާތަކުން އިލްތިމާސްކޮށްފައިވެއެވެ.