ލުބްނާނުގެ މުޖާހިދުންގެ ޖަމާޢަތް ޙިޒްބުﷲގެ ވެރިޔާ އައް ސައްޔިދް ޙަސަން ނަޞްރުﷲ ޝަހިދުވިތާ ފަސްމަސް ފަހުން، އޭނާގެ ޖަނާޒާ ބައިރޫތުގައި ބާއްވައިފިއެވެ. މިދިޔަ ސެޕްޓެމްބަރު މަހު އިސްރާއީލުގެ ޙަމަލާއެއްގައި ޝަހީދުވި ނަޞްރުﷲގެ ޖަނާޒާގައި އެތައް ހާސް ބަޔަކު ބައިވެރިވިއެވެ.
ޖަނާޒާ ބޭއްވީ ބައިރޫތުގެ ދެކުނު ސަރަޙައްދުގައި ހުންނަ 55,000 މީހުންގެ ޖާގައިގެ ސްޓޭޑިއަމެއްގައެވެ. ޖަނާޒާ ފެށުމުގެ އެތައް އިރެއް ކުރިން ސްޓޭޑިއަމް ވަނީ މީހުންނާއިގެން ފުރިފައެވެ. ގިނަ ބަޔަކު ތިބީ ނަޞްރުﷲގެ ފޮޓޯއާއި ޙިޒްބުﷲގެ ދިދަތައް ހިފައިގެންނެވެ.
މި ޖަނާޒާގައި އީރާނުގެ ޚާރިޖީ ވަޒީރު ޢައްބާސް ޢަރާޤްޗީ، ޢިރާޤުގެ ޝީޢީ ސިޔާސީ ވެރިންނާއި އަސްކަރީ ކޮމާންޑަރުން، އަދި ޔަމަނުގެ ހޫޘީންގެ މަންދޫބުން ވެސް ބައިވެރިވިއެވެ. މީގެ އިތުރުން 65 ޤައުމަކުން ގާތްގަނޑަކަށް 800 އެއްހާ މަންދޫބުންނާއި އެތައް ހާސް ޢާންމުންނާއި ދުނިޔޭގެ އެކި ކަންކޮޅުތަކުން އެކްޓިވިސްޓުން ވެސް ޖަނާޒާގައި ބައިވެރިވިއެވެ.
ނަޞްރުﷲގެ ޖަނާޒާއާއެކު، އޭނާ ޝަހީދުވުމަށްފަހު ހަފްތާއެއްހާ ދުވަހު ޙިޒްބުﷲ ހިންގެވި ހާޝިމް ޞަފީއްދީންގެ ޖަނާޒާ ވެސް ބޭއްވުނެވެ. ޞަފީއްދީންވެސް ވަނީ އިސްރާއީލުގެ ޙަމަލާއެއްގައި ޝަހީދުކޮށްލާފައެވެ.
ނަޞްރުﷲގެ ޖަނާޒާ މިހާ ބޮޑު މައިދާނެއްގައި ބޭއްވުމުގެ މަޤްޞަދަކީ މިދިޔަ އަހަރު އިސްރާއީލާއި ދެކޮޅަށް ކުރި ހަނގުރާމައިގައި ބަލިކަށިވވެފައިވާ ޙިޒްބުﷲގެ ހިތްވަރު ދެއްކުން ކަމަށް ބެލެވެއެވެ.
ޖަނާޒާގެ ރަސްމިއްޔާތު ނިމުމަށްފަހު ނަޞްރުﷲ ފަސްދާނުލާނީ ބައިރޫތުގެ ވައިގެ ބަނދަރު ކައިރީގައި އޮންނަ ބިމެއްގައެވެ. އެތަނުގައި ވަނީ 1997 ވަނަ އަހަރު ޝަހީދުވި އޭނާގެ ދަރިކަލުން ހާދީވެސް ފަސްދާނުލާފައެވެ.
