އީދަށް 36 ރަށެއް ޒީނަތްތެރިކުރުމަށް އީދު ލައިޓު ގެންނަނީ

މިއަހަރުގެ ފިތުރު އީދަށް 36 ރަށެއް ޒީނަތްތެރިކުރުމަށް އީދު ލައިޓް ގެންނަން ސަރުކާރުން ނިންމައިފިއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ސިޓީސް، ލޯކަލް ގަވަމަންޓް އެންޑް ޕަބްލިކް ވޯކްސްގެ މިނިސްޓަރ އާދަމް ޝަރީފް ޢުމަރު ވިދާޅުވީ މި އަހަރުގެ ފިތުރު އީދަށް 36 ރަށަކަށް ލައިޓް ގެންނަން ނިންމާފައިވާ ކަމަށާއި މި ލައިޓްތައް ގެންނަނީ އަލަށް ލައިޓްތައް ފޮނުވަން ނިންމާފައިވާ ރަށްތަކަށް ކަމަށެވެ.

މިނިސްޓަރ ވިދާޅުވީ މި ލައިޓްތައް ގެންނަނީ ފަހުންވެސް ބޭނުން ކުރެވޭ ގޮތަށް ކަމަށެވެ. 36 ރަށަކަށް ގެންނަ މި ލައިޓްތަކަށް ޚަރަދުވާނެ ކަމަށް ބެލެވެނީ އެންމެ ގިނަވެގެން 28 މިލިއަން ރުފިޔާ ކަމަށް މިނިސްޓަރ ވިދާޅުވިއެވެ.

މީގެ އިތުރުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުފުޅާއެކު ކޮންމެ އަތޮޅަކުން އާބާދީ އެންމެ ބޮޑު ދެރަށަކަށް އީދު ލައިޓް ދިއްލުމަށް ބޭނުންވާ ވަސީލަތްތައް ފޮނުވުމަށް ވެސް ހަމަޖެހިފައިވާ ކަމަށް މިނިސްޓަރ ވިދާޅުވިއެވެ.

އީދު ލައިޓް ދިއްލަން ބޭނުންވާ ވަސީލަތްތައް ކުރީ ފަހަރު ފޮނުވާފައިވަނީ މައިގަނޑު ގޮތެއްގައި އަތޮޅުތަކުގައި އަތޮޅު ވެރިކަން ކުރާ ރަށް ރަށަށެވެ.

މިނިސްޓަރ ވިދާޅުވީ ފިނޭންސް މިނިސްޓްރީ އަދި ސްޓެލްކޯއާ މަޝްވަރާކޮށްގެން، އީދު ލައިޓްތައް ދިއްލުމަށް ރަށްރަށަށް ފޮނުވަންޖެހޭ ވަސީލަތްތައް ހޯދުމުގެ މަސައްކަތް ވެސް ކުރަމުންދާ ކަމަށެވެ.