މާލޭގެ މަޖީދީމަގުގައި ހުންނަ ފުރުޓް ޓްރީ އެޕަލް ފިހާރައިގެ ގުދަނުގައި އިއްޔެރޭ ފަތިހު ރޯވި އަލިފާނުގެ ހާދިސާ އާއި ގުޅިގެން، އެ ހާދިސާ ހިނގި އިމާރާތުން ރޫޅަންޖެހޭ ތަންތަން ރޫޅައި، ތަޅަންޖެހޭ ތަންތަން ތެޅުމުގެ މަސައްކަތް މިނިސްޓްރީގެ މުވައްޒަފުން ފަށައިފިއެވެ.
މިނިސްޓްރީ އޮފް ސިޓީސް، ލޯކަލް ގަވަރމެންޓް އެންޑް ޕަބްލިކް ވޯކްސްއިން މަޢުލޫމާތު ދެއްވިގޮތުގައި، މި މަސައްކަތް ފަށާފައިވަނީ ހާދިސާ ހިނގި އިމާރާތާއި އިންވެގެން ހުރި ތަންތަނުގެ ރައްކާތެރިކަމަށް ޓަކައެވެ.
އެމްއެންޑީއެފްއިން ބުނާގޮތުގައި، އެތަނުގައި އަލިފާން ރޯވެގެން އުޅޭކަން ރިޕޯޓްކޮށްފައިވަނީ އިއްޔެ ރޭ 04:20 ހާއިރުއެވެ. މި ހާދިސާގައި ގުދަނަށް ބޮޑެތި ގެއްލުންތައް ލިބި، ބޭނުން ނުކުރެވޭ ވަރަށް އަނދާފައިވާ ކަމަށް އެމްއެންޑީއެފްއިން ވިދާޅުވެފައިވެއެވެ.
Advertisement
މި ހާދިސާއާ ގުޅިގެން، 10 ގޭބިސީއެއްގެ 33 މީހަކަށް ވަގުތީ ބޯހިޔާވަހިކަން ބޭނުންވެފައިވާ ކަމަށް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން މަޢުލޫމާތު ދީފައިވެއެވެ. މީގެ ތެރެއިން 5 ގޭބިސީއެއްގެ 22 މީހަކަށް ވަގުތީ ބޯހިޔާވަހިކަމާއި ކެއިންބުއިން ސަރުކާރުން ވަނީ ހަމަޖައްސައި ދީފައެވެ.
