މާލީ ގޮތުން ކައުންސިލްތައް ބާރުވެރިކުރުމަށް ސަރުކާރުން ކުރާ މަސައްކަތްތަކުގެ ތެރެއިން ފަޅުރަށްތައް ކައުންސިލްތަކާ ހަވާލުކުރުމުގެ އުޞޫލުގެ ދަށުން ފުރަތަމަ ފަހަރަށް ފަޅުރަށްތައް ރަސްމީކޮށް މިއަދު ހަވާލުކޮށްފިއެވެ.
މިއީ މި ގޮތަށް ކައުންސިލްތަކަށް ރަށްތައް ދޫކުރި ފުރަތަމަ ފަހަރެވެ.
މި ފަޅުރަށްތައް ކައުންސިލްތަކާ ހަވާލުކުރުމަށް ސިޓީސް، ލޯކަލް ގަވަނެންސް އަދި ޕަބްލިކް ވޯކްސް މިނިސްޓްރީ އާއި ފިނޭންސް މިނިސްޓްރީ ގުޅިގެން މިއަދު ބޭއްވި ރަސްމިއްޔާތެއްގައި ވަނީ އެކަމުގެ އެއްބަސްވުމުގައި ކައުންސިލްތަކާއެކު ސޮއިކޮށްފައެވެ.
Advertisement
ފުރަތަމަ ބުރުގައި އެކަމަށް އެދި ހުށައެޅި ކައުންސިލްތަކުގެ ތެރެއިން ތިން ކައުންސިލަކަށް ހަތަރު ފަޅުރަށެއް މިއަދު ވަނީ ދޫކޮށްފައެވެ. އޭގެ ތެރޭގައި އަތޮޅު ކައުންސިލަކާއި އިތުރު ދެ ރަށެއްގެ ކައުންސިލް ހިމެނެއެވެ.
އެއީ، ދ. އަތޮޅު ކައުންސިލަށް އެ އަތޮޅު މިނިމަސްގަލި އާއި ފެންފުށި، ރ. އިނގުރައިދޫ ކައުންސިލަށް އެ އަތޮޅު ނެޔޮ އަދި ލ. މާވަށު ކައުންސިލަށް އެ އަތޮޅު ބޮޑުމާބުޅަލި އެވެ.
ކައުންސިލްތަކަށް ފަޅު ރަށްތައް ދޫކުރުމަށް ރައީސް ޑރ. މުޙައްމަދު މުޢިއްޒު ނިންމެވީ ބިން ކުޑަ ރަށްތަކަށް އިޤްތިޞާދީ މަސައްކަތްތައް ކުރެވޭނެ މަގު ފަހިކޮށްދިނުމާއި ކައުންސިލްތައް ޒިންމާދާރުކުރުވައި މާލީ ގޮތުން ބާރުވެރި މަސައްކަތްތަކެއް ކުރާ ބަޔަކަށް ހެދުމަށް ގެންގުޅުއްވާ ސިޔާސަތުގެ ދަށުންނެވެ.
