ސެނަހިޔާގައި ކުޑަކުދިންނަށް ވެކްސިން ދިނުމާއި ހެދިބޮޑުވުން މޮނިޓަރ ކުރުމުގެ ޚިދުމަތް ފަށައިފި

ސެނަހިޔާ ހޮސްޕިޓަލުގައި 5 އަހަރުން ދަށުގެ ކުޑަކުދިންނަށް ވެކްސިން ދިނުމާއި، ހެދިބޮޑުވުން މޮނިޓަރ ކުރުމުގެ ޚިދުމަތް މިއަދު ފަށައިފިއެވެ. މި ޚިދުމަތް އިފްތިތާޙްކޮށްދެއްވީ ސިއްޙަތާއި ބެހޭ ވަޒީރުގެ ނާއިބު އަހުމަދު ހަމްދާން ނާސިރެވެ.

ސެނަހިޔާ ހޮސްޕިޓަލުން މި ޚިދުމަތް ފެށުމުގެ މައިގަނޑު މަޤްސަދަކީ ކުޑަކުދިންގެ ދުޅަހެޔޮކަމާއި ކުރިއެރުމަށް ބޭނުންވާ ސިއްޙީ އެހީތެރިކަން ފޯރުކޮށްދިނުމެވެ. ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މަޢުލޫމާތު ދިންގޮތުގައި، ރޫޓިން ޝެޑިއުލްގައި ހިމެނޭ ހުރިހާ ވެކްސިނެއްގެ ޚިދުމަތް މިހާރު ސެނަހިޔާ ހޮސްޕިޓަލުން ލިބެން ހުންނާނެއެވެ.

ސެނަހިޔާ ހޮސްޕިޓަލުން މި ޚިދުމަތް ފޯރުކޮށްދޭނީ ހުކުރު ދުވަސް ފިޔަވައި ކޮންމެ ދުވަހެއްގެ ވެސް ހެނދުނު 9:00 އިން މެންދުރު 12:00 އަށެވެ. މިއީ މައިންބަފައއީ މައިންބަފައިންނަށް ފަސޭހަވާނެ ގޮތަށް ހަމަޖައްސާފައިވާ ގަޑިތަކެކެވެ.

މިހާރުވެސް ދަމަނަވެށީގެ އިތުރުން މާލެ، ހުޅުމާލެ އަދި ވިލިމާލޭގެ ހުރިހާ ހޮސްޕިޓަލްތަކުންނާއި ޕަބްލިކް ހެލްތު ޔުނިޓްތަކުން ވެސް ވެކްސިން ޖެހުމުގެ ޚިދުމަތް ދަނީ ފޯރުކޮށްދެމުންނެވެ. ނަމަވެސް، ސެނަހިޔާ ހޮސްޕިޓަލުން މި ޚިދުމަތް ފެށުމާއެކު، އިތުރު ގިނަ ބަޔަކަށް މި ޚިދުމަތް ލިބުމުގެ ފުރުސަތު ފަހިވެގެންދާނެއެވެ.