އައިޖީއެމްއެޗު އާއި ސޮސައިޓީ އޮފް އޮބްސްޓެޓްރިކްސް އެންޑް ގައިނެކޮލޮޖިސްޓްސް އޮފް މޯލްޑިވްސް (އެސްއޯޖީއެމް) ގުޅިގެން ރާއްޖޭގައި ފުރަތަމަ ފަހަރަށް ގައިނޮކޮލޮޖިކަލް ސާޖިކަލް ވޯކްޝޮޕެއް ފަށައިފި އެވެ.
މި ވޯކްޝޮޕް ފައްޓަވައިދެއްވީ ހެލްތު މިނިސްޓަރު އަބްދުﷲ ނާޒިމް އިބްރާހިމެވެ.
މިނިސްޓަރު ވިދާޅުވީ ރާއްޖޭގައި ގައިނެކޮލޮޖީގެ ފަރުވާ ކުރިއެރުވުމަށް މި ހަރަކާތް ވަރަށް މުހިންމެވެ.
Advertisement
މިނިސްޓްރީން ބުނީ މި ވޯކްޝޮޕްގައި ގައިނެކޮލޮޖިސްޓުންނާއި އޮޕަރޭޓިން ރޫމް ނަރުހުންނަށް އަމަލީ ތަމްރީނު ދިނުމަށް ހަމަޖެހިފައިވާއިރު، ހުޅުމާލެ ހޮސްޕިޓަލާއި ޓްރީޓޮޕް ހޮސްޕިޓަލާއި އޭޑީކޭ ހޮސްޕިޓަލް އަދި މެޑިކާ ހޮސްޕިޓަލްގެ ހަތް ގައިނެކޮލޮޖިސްޓުން މި ވޯކްޝޮޕްގައި ބައިވެރިވާ ކަމަށެވެ.
މި ވޯކްޝޮޕްގެ ސަބަބުން ރާއްޖޭގައި މިހާރު ވެސް އަންހެނުންގެ ހާއްސަ ބަލިތަކުގެ ފަރުވާއަށް ލިބެންހުރި ހިދުމަތްތައް އިތުރަށް ފުރިހަމަވާނެ ކަމަށާއި އަންހެނުންގެ ބަލިތަކަށް ހާއްސަ ދިވެހި ސާޖަނުންނަށް މުހިންމު ތަޖުރިބާތަކެއް ލިބޭ ކަމަށް މިނިސްޓްރީން ބުންޏެވެ.
މިނިސްޓްރީން ބުނީ މިކަމަކީ އަންހެނުން ބާރުވެރި ކުރުމުގެ ގޮތުން އެކަނބަލުންގެ ސިއްހަތަށް އަހަންމިޔަތުކަން ދިނުމަށް އެޅޭ މުހިންމު ފިޔަވަޅެއް ކަމަށެވެ.
މި ވޯކްޝޮޕް ކުރިއަށް ގެންދިއުމަށް ޗައިނާގެ ބެއިޖިންގައި މަސައްކަތްކުރައްވާ ތަޖުރިބާކާރު ޕްރޮފެސަރު ޑރ. ޝިއައުމިންގް ގޮންގް ވަނީ ރާއްޖެ ވަޑައިގެންފަ އެވެ. އޭނާ އަކީ އިންވޭސިވް ގައިނަކޮލޮޖިކް ސަޖަރީ (އެމްއައިޖީއެސް)ގެ ރޮނގުގައި ފާހަގަކޮށްލެވޭ ދުނިޔޭގެ ފެންވަރުގެ މާހިރެކެވެ.
ޕްރޮފެސަރު ގޮންގް އަކީ ރަހިމުގެ ފައިބްރޮއިޑް އެބްލޭޝަން ތެރަޕީގެ އާ މަގެއް ހުޅުވާލި ބޭފުޅެކެވެ. އަހަރަކު 500 އަށް ވުރެ ގިނަ ސަޖަރީ ހައްދަވާއިރު، އޭގެ ތެރެއިން 95 ޕަސެންޓަކީ މިނިމަލީ އިންވޭސިވް އުކުޅުތައް ބޭނުންކޮށްގެން ހަދާ ސަޖަރީތަކެވެ. އޭނާއަކީ ސިންގަލް-ޕޯޓް ލެޕޮރޮސްކޯޕިކް ސާޖަރީ، ވީ-ނޯޓްސް ސަޖަރީ އަދި ލިންސް ހިސްޓަރޮސްކޮޕިކް ރިސެކްޝަން ޓެކްނިކް ކަހަލަ ޕްރޮސީޖާތައް ޗައިނާއަށް ތައާރަފުކުރި ބޭފުޅެކެވެ.
