މަސްތުވާތަކެތީގެ މައްސަލައެއްގައި އުފުލާފައިވާ މަނީ ލޯންޑަރިންގގެ ކުށުގެ ދައުވާއެއް ފުރަތަމަ ފަހަރަށް ސާބިތު ވެއްޖެއެވެ. މި މައްސަލައިގައި ހަތަރު މީހެއްގެ މައްޗަށް ދައުވާ އުފުލާފައި ވެއެވެ.

ދައުވާ އުފުލާފައިވާ ފަރާތްތަކަކީ:

1. އިސްމާއިލް ޝަރީފް (ތ. ތިމަރަފުށި، ވައިޓްރޯސް)

2. ޝާނިޔާ އިބްރާހީމް (ކ. މާލެ، މއ. ހަސްލަތު)

3. ހަސަން ރަޝީދު (ހުޅުމާލެ، ފްލެޓް ނަންބަރު 01-ޖީ-45)

4. ހަސަން ލޫތު (ގދ. ތިނަދޫ، ރަންގަލް)

މި ހަތަރު މީހުންގެ މައްޗަށް އުފުލާފައި ވަނީ ޑައިމޯފިން ޓްރެފިކް ކުރުމުގެ ކުށުގެ ދައުވާއާއި، މަނީ ލޯންޑަރިންގގެ ކުށުގެ ދައުވާއެވެ. މި މައްސަލަ ގުޅެނީ 2021 ޖަނަވަރީ 12 ވަނަ ދުވަހު ދިވެހިރާއްޖެއަށް މަސްތުވާތަކެތި އެތެރެކޮށް، ބޭނުންކޮށް، ގެންގުޅެ އަދި ޓްރެފިކް ކުރާ ކަމަށް ތުހުމަތު ކުރެވުނު މައްސަލައާއި އެވެ.

މި މައްސަލައިގައި ހިމެނޭ މީހުންގެ މައްޗަށް މަސްތުވާތަކެތި ޓްރެފިކް ކުރުމުގެ ދައުވާ ކުރިން ސާބިތުވެ، ހަތަރު މީހުން ވެސް އުމުރަށް ޖަލަށް ލުމަށް ޙުކުމްކޮށްފައި ވެއެވެ. އަދި ކުށްކޮށްގެން ހޯދި މުދާ ދައުލަތަށް ނެގުމަށް ވެސް ޙުކުމްކޮށްފައި ވެއެވެ.

މިހާރު އެ މީހުންގެ މައްޗަށް ސާބިތުވެފައިވަނީ މަނީ ލޯންޑަރިންގގެ ކުށުގެ ދައުވާއެވެ. މި މައްސަލައިގައި ފުލުހުން ބަލައި ފާސްކުރި ތަންތަނުން ޖުމްލަ 1,542,675 ރުފިޔާ ފެނިފައި ވެއެވެ.

ކްރިމިނަލް ކޯޓުން މި ދައުވާ ސާބިތުވާކަމަށް ކަނޑައަޅައި ޙަސަން ލޫތު އާއި ޙަސަން ރަޝީދު 5 އަހަރުގެ މުއްދަތަށް ޖަލަށް ލުމާއެކު 500,000 ރުފިޔާއިން ޖޫރިމަނާކުރިއެވެ.

އިސްމާއިލް ޝަރީފާއި ސާނިޔާ އިބްރާހިމް އަށް ކުރި ޙުކުމަކީ 5 އަހަރުގެ މުއްދަތަށް ޖަލަށް ލުމާއެކު 100,000 ރުފިޔާއިން ޖޫރިމަނާ ކުރުމެވެ.

މި އެންމެންގެ ޖޫރިމަނާގެ ފައިސާ 12 މަސް ދުވަހުގެ ތެރޭގައި މީރާއަށް ދެއްކުމަށް ވެސް ޙުކުމުގައި ބަޔާންކޮށްފައިވެއެވެ. މި މައްސަލަ ކްރިމިނަލް ކޯޓުގައި ނިންމެވީ ގާޒީ އިސްމާއިލް ޝަފީއުއެވެ.