ރާއްޖޭގެ އިޤްތިޞާދީ އަދި މާލީ ހާލަތު ރަނގަޅުކުރުމަށް ސަރުކާރުން އަޅަމުންދާ ފިޔަވަޅުތަކާއި ގުޅިގެން އިންޓަނޭޝަނަލް މަނިޓަރީ ފަންޑު (އައިއެމްއެފް)ގެ ވަފުދުން މަރުޙަބާ ކިޔައިފިއެވެ.
އިޤްތިޞާދީ ކަންކަމާއި ގުޅިގެން ރައްޔިތުންގެ މަޖިލީހުގެ މާލިއްޔަތު ކޮމިޓީއާއި އިޤްތިޞާދީ ކޮމިޓީގެ ޖޮއިންޓް ކޮމިޓީ ބައްދަލުވުމެއް މިއަދު ބޭއްވުނެވެ. މި ބައްދަލުވުމުގައި އައިއެމްއެފްގެ ވަފުދުން ބައިވެރިވެ، ރާއްޖޭގެ މާލީ ހާލަތާ ގުޅޭ މަޝްވަރާތައް ކުރިއެވެ. ރާއްޖޭގެ އިޤްތިޞާދަސް ފާހަގަ ކޮށްލެވޭ ކުރިއެރުން ލިބިފައިވާކަން ފާހަގަކުރައްވައި، އެހެންނަމަވެސް، މާލީ އިޞްލާޙީ ފިޔަވަޅުތައް އެޅުން ޑިލޭ ނުކުރުމަށް އެދިވަޑައިގަތެވެ.
ސަރުކާރުން މިހާރު ވެސް ވަނީ ޚަރަދު ކުޑަކުރުމުގެ ގޮތުން ގިނަ ފިޔަވަޅުތައް އަޅާފައެވެ.
އައިއެމްއެފްގެ ވަފުދުން ފާހަގަކުރި ގޮތުގައި ރާއްޖެއިން އެޅުމަށް ނިންމާފައިވާ މާލީ އިޞްލާޙީ ފިޔަވަޅުތަކަކީ ރަނގަޅު ފިޔަވަޅުތަކެކެވެ.
މި ބައްދަލުވުމުގައި ވާހަކަދެއްކެވި މާލިއްޔަތު ކޮމިޓީގެ މުޤައްރިރު، މާމިގިލީ ދާއިރާގެ މެންބަރު ޤާސިމް އިބްރާހީމް ވިދާޅުވީ ސަރުކާރުގެ ޕްލޭންއާއި އަޅުއްވާ އިޞްލާޙީ ފިޔަވަޅުތަކަށް އިތުބާރު އެބައޮތް ކަމަށެވެ. އަދި އިޤްތިޞާދު ހީނަރުވެފައި އޮތް އޮތުމަށް ޙައްލެއް ލިބި، ސަރުކާރުގެ އަމާޒަށް ވާޞިލުވެވޭނެ ކަމަށް ވިދާޅުވެ ޤާސިމް ވަނީ ސަރުކާރުގެ ޕޮލިސީއަށް ތަޢުރީފުކުރައްވާފައެވެ.
އެހެންނަމަވެސް، ސަބްސިޑީއަކީ ރައްޔިތުންނަށް ދެމުންދާ މުހިންމު މާލީ އެހީއެއް ކަމަށް ޤާސިމް ފާހަގަކުރެއްވިއެވެ. "ދިރިއުޅުމުގެ ކަންކަން ހަމަޖައްސަން ސަބްސިޑީއަކީ ވަރަށް ބޭނުންތެރި އެއްޗެއް. ވަކި ސަރުކާރެއް ނޫން، ކޮންމެ ސަރުކާރަކުން ވެސް އެކަން ކުރަނީ އެހެންވެ،" ޤާސިމް ވިދާޅުވިއެވެ.
ސަރުކާރުން މިހާރު ވަނީ މާލީ ހާލަތު ރަނގަޅުކުރުމަށް ގިނަ ދާއިރާތަކެއް ރިފޯމްކުރުމުގެ މަސައްކަތް ފަށާފައެވެ. މިގޮތުން މިއަހަރުގެ ބަޖެޓުގައި ސަބްސިޑީ ނިޒާމަށް ބަދަލުގެނައުމަށް ހިމަނާފައިވީ ނަމަވެސް، ރައީސް ޑރ. މުޙައްމަދު މުޢިއްޒު ވަނީ ދިވެހި އެއްވެސް ރައްޔިތަކަށް ލިބޭ ސަބްސިޑީ، ޕެންޝަން އަދި އާސަންދަ ކުރިއަށް އޮތް ތަނުގައި ނުކަނޑާނެ ކަމަށް ވިދާޅުވެފައެވެ. އޭގެ ބަދަލުގައި ބޭކާރު ވަމުންދާ އަދި ނާޖާއިޒު ގޮތެއްގައި ކުރަމުންދާ ޚަރަދުތައް ހުއްޓާލައި އެފަދަ ޚަރަދުތައް އުނިކުރައްވާނެ ކަމަށް އެމަނިކުފާނު ވިދާޅުވިއެވެ.
