2025 ވަނަ އަހަރުގެ ދިރާސީ އަހަރަށް އެއްރަށުން އަނެއްރަށަށް ބަދަލުވާ ދަރިވަރުން ސްކޫލު ބަދަލުކުރުމުގެ ފުރުސަތު އެޑިޔުކޭޝަން މިނިސްޓްރީ އިން މިއަދު ހުޅުވައިލައިފިއެވެ.
އެޑިޔުކޭޝަން މިނިސްޓްރީން މިއަދު ނެރުނު ނޫސްބަޔާނެއްގައި ބުނެފައިވަނީ، ކުރިއަށް އޮތް ދިރާސީ އަހަރު ފެށުމުގެ ކުރިން، އެކަށީގެންވާ ވަގުތު އޮއްވައި ދަރިވަރުން ސްކޫލުތަކަށް ވެއްދުމުގެ މަސައްކަތް އެ މިނިސްޓްރީ އިން އަންނަނީ ދުރާލައި ކުރަމުންނެވެ. އެގޮތުން 2025 ވަނަ އަހަރުގެ ދިރާސީ އަހަރަށް ދަރިވަރުން ކިޔަވަމުންދާ ސްކޫލުން އެހެން ރަށެއްގެ ސްކޫލަކަށް ބަދަލުކުރާނަމަ، އެކަމަށް އެދުމުގެ ފުރުސަތު 06 މާރިޗް 2025 ގެ ނިޔަލަށް ހުޅުވާލާފައިވާ ކަމަށް އެ މިނިސްޓްރީން ބުންޏެވެ.
މިނިސްޓްރީން އިތުރަށް ބުނީ، 15 މާރިޗު 2025ގެ ކުރިން ދަރިވަރުން ސްކޫލަށް ވެއްދުމާއި ގުޅުން ހުރި ހުރިހާ މަސައްކަތެއް ނިންމުމަށް ހަމަޖެހިފައިވާ ކަމަށެވެ. މިފަދައިން ހަމަޖައްސާފައިވަނީ 2025 ވަނަ އަހަރުގެ ދިރާސީ އަހަރު ފެށެނީ ރަމަޟާން މަހުގެ ފަހު ދިހައިގެ ބަންދު ދުވަސްތަކާއި ފިތުރު ޢީދުގެ ބަންދު ދުވަސްތަކަށްފަހު ކަމަށްވާތީ ކަމަށް ވެސް އެ މިނިސްޓްރީން ފާހަގަކުރިއެވެ.
Advertisement
ދަރިވަރުން އެހެން ރަށެއްގެ ސްކޫލަކަށް ބަދަލުކުރާނަމަ، އެކަމަށް އެދި "ދަރިވަރު ކިޔަވަމުން އަންނަ ސްކޫލުން، ބަދަލުވާން އެދޭ ސްކޫލަކަށް އެކަމަށް އެދޭ ފޯމު" ހުށައަޅަން ޖެހޭނެ ކަމަށާއި އެ ފޯމު ހުށައަޅާނީ މިހާރު ކިޔަވަމުންދާ ސްކޫލަށްކަން އެޑިޔުކޭޝަން މިނިސްޓްރީން ބުންޏެވެ. އަދި މި ފުރުސަތުގެ ސުންގަޑިއަކީ 06 މާރިޗް 2025 ގެ މެންދުރު 2:00 ކަމަށްވެސް އެ މިނިސްޓްރީން ހާމަކުރިއެވެ.
މީގެ އިތުރުން، މިހާރު ހިނގަމުންދާ 2024 ވަނަ އަހަރުގެ ދިރާސީ އަހަރުގެ ބާކީ ދުވަސްކޮޅުގެ ތެރޭގައި ދަރިވަރުން އެއްރަށެއްގެ ސްކޫލުން އަނެއް ރަށުގެ ސްކޫލަށް ބަދަލުވުމުގެ ކަންތައްތައް ކުރިއަށް ނުގެންދާނެ ކަން ސްކޫލުތަކަށް އަންގާފައިވާ ކަމަށް ވެސް އެޑިޔުކޭޝަން މިނިސްޓްރީން ބުންޏެވެ. މިއީ މި ދުވަސްވަރަކީ ދަރިވަރުންގެ އިމްތިޙާނާއި އެސެސްމެންޓްތައް އަދި ދަރިވަރުންގެ ރިޕޯޓް ފޯމު ތައްޔާރުކުރާ ދުވަސްވަރަށްވާތީ ކަމަށް މިނިސްޓްރީން ފާހަގަކުރިއެވެ.
