ޚާއްސަ އެހީތެރިކަމަށް ބޭނުންވާ ކުދިންނަށް ކިޔަވައިދޭ 600 އަށް ވުރެ ގިނަ ޓީޗަރުން ސްކޫލްތަކަށް ބޭނުންވާ ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވެއްޖެއެވެ.
ރައީސް ޑރ. މުޙައްމަދު މުއިއްޒުގެ ރިޔާސީ ބަޔާނާއި ގުޅިގެން ބޭއްވުނު ޕެނަލް ޑިސްކަޝަންގައި މިނިސްޓަރު ޝަފީއު ވިދާޅުވީ، 230 އަށް ވުރެ ގިނަ ޕްރައިމަރީ ޓީޗަރުން ބޭނުންވާ ކަމަށާއި، ޚާއްސަ އެހީއަށް ބޭނުންވާ ކުދިންނަށް ކިޔަވައިދޭ ސެން ޓީޗަރުން ގިނަ އަދަދަކަށް ބޭނުންވާ ކަމަށެވެ.
މީގެ އިތުރުން، ތައުލީމީ ދާއިރާއަށް އިތުރަށް ޒުވާނުން ބޭނުންވާ ކަމަށާއި އެގޮތުން ޓީޗަރުން ބިނާކުރުމަށް މިނިސްޓްރީން މިހާރު ވެސް މަސައްކަތް ކުރަމުންދާކަން މިނިސްޓަރު ފާހަގަ ކުރެއްވިއެވެ.
Advertisement
މިނިސްޓަރު ވިދާޅުވީ ޓީޗަރުން ބިނާކުރުމުގެ ގައުމީ ޕްރޮގްރާމުގައި 100 އަށް ވުރެ ގިނަ ދަރިވަރުން ބައިވެރިވެފައިވާ ކަމަށާއި، ކުރިއަށް އޮތް 10 އަހަރު ތެރޭގައި ގާބިލް، ޒުވާން ޓީޗިން ފޯސްއެއް ބިނާކުރެވިގެންދާނެ ކަމަށް އުންމީދުކުރައްވާ ކަމަށެވެ.
ރައީސް މުއިއްޒު ވަނީ ސެން ޓީޗަރުންގެ ރިސްކް އެލަވަންސް ލިބޭނެ ގޮތް ހަމަޖައްސަވައިދެއްވާނެ ކަމަށް ވިދާޅުވެފައެވެ. މިހާރު އެޑިއުކޭޝަން ޑިވެލޮޕްމަންޓު ޕްރޮފެޝަނަލުންގެ މުސާރައިގެ އޮނިގަނޑުގައި އެންމެ ދަށް ރޭންކުގެ މުވައްޒަފަކަށް ވެސް 20,000 ރުފިޔާއަށް ވުރެ ބޮޑު މުސާރައެއް ލިބޭ ކަމަށް މިނިސްޓަރު ފާހަގަކުރެއްވިއެވެ.
