މި އަންނަ ރޯދަ މަހު ގިނަ އަދަދެއްގެ ދީނީ ޕްރޮގްރާމްތައް ބާއްވަން އިސްލާމިކް މިނިސްޓްރީން ތައްޔާރުވެއްޖެ އެވެ. އިސްލާމިކް މިނިސްޓްރީން ބުނީ އެހެން އަހަރުތަކެކޭ އެއްގޮތަށް މި އަހަރުގެ ރޯދަ މަހަށް ވެސް އެ މިނިސްޓްރީން ގިނަ ހަރަކާތްތަކެއް ކުރިއަށް ގެންދިއުމަށް ހަމަޖެހިފައިވާ ކަމަށެވެ.

ރޯދަ މަސް އިހްޔާކުރުމުގެ ގޮތުން ކުރިއަށް ގެންދާ މި ޕްރޮގްރާމުތަކަކީ ރައްޔިތުންގެ މެދުގައި އިސްލާމް ދީނުގެ ޝިއާރު ފާޅުކޮށް، ރޯދަ މަހުގެ ރޯދަ އާއި އެކު އަޅުކަމަށް ރައްޔިތުން އިތުރަށް ހީވާގިކޮށް ހޭލުންތެރިކުރުވައި އިސްލާމް ދީނުގެ ސައްހަ މައުލޫމާތު ފޯރުކޮށްދިނުމުގެ މަތިވެރި މަގުސަދުގައި ދިވެހި ދައުލަތުން ވަރަށް ބޮޑު އަހަންމިއްޔަތު ކަމެއް ދީގެން ހިންގާ ޕްރޮގްރާމްތަކެއް ކަމަށް މިނިސްޓްރީން ބުންޏެވެ.

މިނިސްޓްރީން ބުނީ ރޯދަ މަހަށް މަރުހަބާ ކިޔުމުގެ ގޮތުން ދެ ޕްރޮގްރާމެއް ކުރިއަށް ގެންދިއުމަށް ހަމަޖެހިފައިވާ ކަމަށެވެ. އެއީ:

މައިންޑްފުލް ރަމަޟާން ނަމުގައި ކުރިއަށް ގެންދެވޭ ވޯކްޝޮޕަކާއި,

މަރުހަބާ ރަމަޟާންގެ ނަމުގައި ބާއްވާ ބޮޑު ދަރުހެވެ.

"މަރުހަބާ ރަމަޟާން" ދަރުހަކީ މާލެ އާޓިފިޝަލް ބީޗުގައި ކުރިއަށް ގެންދިއުމަށް ހަމަޖެހިފައިވާ ދަރުހެކެވެ. މިދިޔަ އަހަރު ވެސް ބޭއްވި މި ދަރުހަށް އާއްމުންގެ ބޮޑު ތަރުހީބެއް ލިބުނެވެ.

މިނިސްޓްރީން ބުނި ގޮތުގައި، މާލޭގައި އަށް އިހްޔާ ފޯރަމް ކުރިއަށް ގެންދިއުމަށް ހަމަޖެހިފައިވާ އިރު، ހަތް ސިޓީ/ރަށެއްގައި މި އަހަރު އިހްޔާ ފޯރަމްތައް ކުރިއަށް ގެންދިއުމަށް ނިންމާފައިވެ އެވެ.

އިހްޔާ ފޯރަމް ބާއްވާނެ ސިޓީ/ރަށްތައް ކަނޑައަޅާފައި ވަނީ ކައުންސިލްތަކުން އެކަމަށް އެދި ހުށަހެޅި ޕްރޮޕޯސަލް ވިލަރެސް ކުރުމަށް ފަހުގައި އެންމެ ރަނގަޅު ޕްރޮޕޯސަލް ހުށަހެޅި ރަށްތަކަށް ބަލައިގެން ކަމަށް މިނިސްޓްރީން ބުންޏެވެ.

ސްކޫލް ދަރިވަރުންގެ މެދުގައި ރޯދަ މަހު ދީނީ ހޭލުންތެރިކަން އިތުރުކުރުމަށް ދަރިވަރުންގެ ހަ އިހްޔާ ފޯރަމެއް ކުރިއަށް ގެންދިއުމަށް ވެސް ވަނީ ހަމަޖެހިފަ އެވެ.

މީގެ އިތުރުން ރޯދަ މަހުގެ ކޮންމެ ހޮނިހިރު ދުވަހަކު މާލޭގައި އައުޓްރީޗް ޕްރޮގްރާމެއް ހިންގުމަށް ހަމަޖެހިފައިވާއިރު، އެ ޕްރޮގްރާމުގައި ކުޑަކުދިން ޝައުގުވެރިވާނެ ކުޅިވަރު ހަރަކާތްތަކާއި ދީނީ ކައުންސެލިން ދިނުމާއި މުސްހަފް އަދި ދީނީ ފޮތް ހިމެނޭ ސްޓޯލްތައް ހެދުމަށް ވެސް ނިންމާފައިވެ އެވެ.

މިނިސްޓްރީން ބުނީ އެހެން އަހަރުތަކެކޭ އެއްގޮތަށް ރޯދަ މަހުގެ ކޮންމެ ދުވަހަކު އަސުރު ނަމާދަށް ފަހު މާލެ ސަރަހައްދުގައި އަސްރު ދަރުސް ބޭއްވުމަށް ވެސް ހަމަޖެހިފައިވާ ކަމަށެވެ.

މިނިސްޓްރީގެ އިސްލާމިކް ސްޓޫޑިއޯ އިން އާންމުން ހޭލުންތެރިކުރުމަށާއި ދީނީ މައުލޫމާތު ފޯރުކޮށްދިނުމަށް ދީނީ ޕްރޮގުރާމުތައް މިނިސްޓްރީގެ ސޯޝަލް މީޑިއާ ވަސީލަތްތައް މެދުވެރިކޮށް ގެނެސްދިނުމަށް ތައްޔާރުވަމުން އަންނަ ކަމަށާއި މިދިޔަ އަހަރު ގެނެސްދިން ބައެއް ޕްރޮގްރާމުތަކާއި މުޅިން އާ ޕްރޮގުރާމުތައް ފެށުމަށް ވެސް ހަމަޖެހިފައިވާ ކަމަށް އިސްލާމިކް މިނިސްޓްރީން ބުންޏެވެ.