އާސަންދަ ރިފޯމް ކުރުމުގެ ތެރެއިން ގެނައި ޚަރަދު ކުޑަކުރުމުގެ ބޮޑެތި ބަދަލުތަކާއި ގުޅިގެން އެންމެ ފަހުގެ ހިސާބުތައް ދައްކާ ގޮތުން ކުރީ ކުއާޓަރުގައި ކުރި ޚަރަދަށް ވުރެ 2024 ވަނަ އަހަރުގެ މުއްދަތުގައި ކުރި ޚަރަދުން 37 މިލިއަން ރުފިޔާ ސަލާމަތް ވެއްޖެއެވެ.
އާސަންދައިން ހާމަކުރި ތަފާސްހިސާބުތަކުން ދައްކާގޮތުގައި 2024 ވަނަ އަހަރުގެ ފަހު ކުއާޓަރގައި ބޭސްފަރުވާއަށް 817 މިލިއަން ރުފިޔާ ޚަރަދުކޮށްފައިވެއެވެ.
އާސަންދައިން ބުނާގޮތުގައި 2023 ވަނަ އަހަރުގެ އޮކްޓޯބަރު 1 އިން ޑިސެމްބަރު 31 އަށް 854 މިލިއަން ރުފިޔާ ޚަރަދުކޮށްފައިވާއިރު، 2024 ގެ އެ މުއްދަތުގައި ޚަރަދުކޮށްފައިވަނީ 817 މިލިއަން ރުފިޔާއެވެ.
މީގެއިތުރުން، 2024 ގެ ފަހު ކުއާޓަރގައި އާސަންދަ މެދުވެރިކޮށް ޚިދުމަތް ހޯދި ފަރާތްތަކުގެ އަދަދުވެސް ވަނީ މަދުވެފައެވެ. 2023 ގައި 279,851 މީހުން ޚިދުމަތް ހޯދާފައިވާއިރު، 2024 ގެ ފަހު ކުއާޓަރގައި 278,330 މީހުން ޚިދުމަތް ހޯދާފައިވެއެވެ.
އާސަންދައިން އިތުރަށް ހާމަކުރި ގޮތުގައި 2024 ގެ ފަހު ކުއާޓަރގައި ކުއްލި ޙާލަތުގައި އެއް ރަށުން އަނެއް ރަށަށް 1,393 ފަހަރު މީހުން ގެންގޮސްފައިވެއެވެ. އަދި މި މުއްދަތުގައި 2,327 ބަލިމީހުން ރާއްޖެއިން ބޭރަށް ފަރުވާއަށް ފޮނުވާފައިމވެއެވެ.
އާސަންދައިގެ ޚަރަދުތައް ކުޑަކުރުމަށްޓަކައި ސަރުކާރުން ވަނީ އެކި ފިޔަވަޅުތައް އަޅަން ފަށާފައެވެ. މީގެ ތެރޭގައި ރާއްޖޭގެ ސިއްޙީ ނިޒާމު ހަރުދަނާ ކުރުމާއި، ބޭސްފަރުވާއަށް ޕްރައިވެޓް އިންޝުއަރެންސްއަށް އިސްކަންދިނުން ހިމެނެއެވެ. އަދި ބަލްކް ޕްރޮކިއުމަންޓް އުސޫލުން ބޭސް އެތެރެކުރުމުގެ އިންތިޒާމު ވެސް ވަނީ ހަމަޖައްސާފައެވެ.
އާސަންދައިގެ ޚަރަދު ކުޑަވި މައިގަނޑު އެންމެ ބޮޑު ސަބަބަކީ ކުރިން އަގު ބޮޑުކޮށް ވިއްކަމުން ގެންދިޔަ ބޭސް މިހާރު އަގު ހެޔޮކޮށްފައި ވާތީއެވެ. މިއީ ބޭސް ވިއްކާ ފަރާތްތަކާއި ސަރުކާރާއި ދެމެދު މަޝްވަރާ ކޮށްގެން ގެނައި ބަދަލެކެވެ.
