ބިދޭސީއެއްގެ އަތުން ތޫނު އެއްޗަކުން ބިރުދައްކައި ފައިސާ ފޭރުނު މައްސަލައެއްގައި ތިން މީހަކު ފުލުހުންގެ ބެލުމުގެ ދަށަށް މިއަދު ގެންގޮސްފިއެވެ.

ފުލުހުން ބުނި ގޮތުގައި މި މައްސަލައިގެ ރިޕޯޓު ލިބުނީ އިއްޔެ ރޭ 22:14 ހާއިރުއެވެ. ހައްޔަރުކުރެވުނު މީހުންނަކީ ސ. ހިތަދޫ، އައްޒާ، މުބާރިކު މުހައްމަދު (34އ)، ޏ. ފުވައްމުލައް، ދިގުވާނޑު/ ގުރަހާގެ، އަހުމަދު ފަޔާޒް (30އ) އަދި ޏ. ފުވައްމުލައް، ދިގުވާނޑު/ ކައިރުގެ، އަހުމަދު ނަދީފް (36އ) އެވެ. މި ތިން މީހުން ހައްޔަރުކުރީ ނޯތު ހާބަރު ސަރަހައްދުންނެވެ.

ފޭރިގަތް ފައިސާގެ ތެރޭގައި 1000 ރުފިޔާ، 10 ޔޫރޯ، 10 ބަންގްލަދޭޝް ޓާކާ، 20 ސްރީލަންކަން ރުފީ، 500 އިންޑިއަން ރުފީ އަދި 2 ސިންގަޕޫރު ޑޮލަރު ހިމެނެއެވެ. ހައްޔަރުކުރެވުނު މީހުންގެ އަތުން 1000 ދިވެހި ރުފިޔާ، 20 ސްރީލަންކަން ރުޕީ އަދި 2 ސިންގަޕޫރު ޑޮލަރު ފެނިފައިވާ ކަމަށް ފުލުހުން މަޢުލޫމާތު ދީފައިވެއެވެ.

ފުލުހުން މިހާރު ދަނީ މި މައްސަލަ އިތުރަށް ތަޙުޤީޤުކުރަމުންނެވެ.