ދިވެހިރާއްޖޭގެ އެކި ސަރަޙައްދުތަކުގައި، ޚާއްޞަކޮށް މާލޭ ސަރަޙައްދުގައި އަޅާފައިވާ ކަރަންޓާއި މުވާޞަލާތީ ކޭބަލްތައް ބުރިކޮށްގެން ވަގަށް ނެގުމުގެ މައްސަލަ އަށް ދާއިމީ ޙައްލެއް ހޯއްދެވުމަށް ވަޒީރުންގެ މަޖިލީހުން މަޝްވަރާ ކޮށްފިއެވެ.
ބޭރުގެ ބާޒާރުގައި ކޮޕަރ (ލޮއި) އަށް ބޮޑު އަގު ލިބޭތީ، ދައުލަތުގެ ސްޓެލްކޯ އަދި ދިރާގު ފަދަ އިންފްރާސްޓްރަކްޗަރ ހަލާކުކޮށްލައިގެންނާއި ހަދަމުންދާ އިމާރާތަކުން ހިންގާ މި ޖިނާއީ ޢަމަލުތައް ހުއްޓުވުމަކީ ޤައުމީ ސަލާމަތާއި ރައްޔިތުންނަށް ދޭ ޚިދުމަތްތަކުގެ ރައްކާތެރިކަމާ ސީދާ ގުޅިފައިވާ ކަމެކެވެ.
ސަރުކާރުން ބޭއްވި ވަޒީރުންގެ މަޖިލީހުގެ ބައްދަލުވުމުގައި މި މައްސަލައިގެ ނުރައްކާތެރިކަމުގެ މައްޗަށް ވަނީ ފުޅާ ދާއިރާއެއްގައި މަޝްވަރާކުރައްވާފައެވެ. ޚާއްޞަކޮށް، ބާރުގަދަ ހައި-ވޯލްޓޭޖް ކޭބަލްތައް ބުރިކުރަން އުޅުމުގެ ތެރޭގައި ކަރަންޓުގައި ޖެހިގެން ފުރާނައަށް ނުރައްކާވާ ފަދަ ބޮޑެތި ޙާދިސާތައް ހިނގަމުންދާތީ ވަޒީރުން ވަނީ ބޮޑު ކަންބޮޑުވުން ފާޅުކުރައްވާފައެވެ. މީގެ އިތުރުން، މިފަދަ ވައްކަންތަކުގެ ސަބަބުން މުޅި ސަރަޙައްދުތަކުން ކަރަންޓާއި، ފެނާއި، އަދި އިންޓަރނެޓްގެ ޚިދުމަތް ކެނޑި، އާންމު ރައްޔިތުންގެ ދިރިއުޅުމަށާއި ވިޔަފާރިތަކަށް އިއާދަނުކުރެވޭ ފަދަ ބޮޑެތި ގެއްލުންތައް ލިބިފާނެތީވެ ވަޒީރުން ވަނީ ކަންބޮޑުވުން ފާޅުކުރައްވާފއެވެ.
Advertisement
މި ބައްދަލުވުމުގައި އެންމެ ޚާއްޞަ ސަމާލުކަމެއް ދެއްވީ، ކުށުގެ މާހައުލުގައި އުޅޭ ކުދިންނާއި ޒުވާނުން ލައްވައި މިފަދަ ވައްކަންތައް ކުރުވައިގެން، ބޮޑު އަގުގައި ކޮޕަރާއި ދަގަނޑު ގަންނަ ގަވާއިދާ ޚިލާފު "ބްލެކް މާކެޓް" ނެޓްވޯކްތައް ނައްތާލުމަށެވެ. އެގޮތުން، ވަގަށް ނަގާ ކޮޕަރާއި ދަގަނޑު ގަނެގެން ބޭރަށް އެކްސްޕޯޓްކުރާ ފަރާތްތަކުން ހިންގާ ވިޔަފާރިތައް ހަރުދަނާ އުޞޫލެއްގެ ދަށުން ކޮންޓްރޯލްކޮށް، އެފަދަ ތަކެތި ގަންނަ މަގުތައް ބަންދުކުރުމަށް ވަނީ ނިންމަވާފައެވެ. މި ފިޔަވަޅުގެ ސަބަބުން ވަގަށް ނަގާ ތަކެތި ވިއްކޭނެ މާކެޓް ހަނިވެ، ވައްކަން ކުރުމުގެ ސިލްސިލާއަށް ނިމުމެއް އަންނާނެ ކަމަށް ސަރުކާރުން ދެކެއެވެ.
ދައުލަތުގެ މުދަލަށް ގެއްލުންދީ، އާންމު ޚިދުމަތްތައް މެދުކަނޑާލާ ފަރާތްތަކާ މެދު ޤާނޫނީ ގޮތުން އެޅޭނެ އެންމެ ހަރުކަށި ފިޔަވަޅުތައް އެޅުމަށް ކަމާބެހޭ މުއައްސަސާތަކަށް ވަނީ އިރުޝާދު ދެއްވާފައެވެ.
