މާލޭގެ މަގުތަކުގެ އަމާންކަމާއި ސަލާމަތްތެރިކަން ގެއްލޭ ގޮތަށް، ފުލުހުންގެ ގާނޫނީ ދައުރު އަދާކުރުމަށް ހުރަސްއަޅައި ހަމަނުޖެހުން ހިންގި މައްސަލައިގައި ހައްޔަރުކުރި އެމްޑީޕީގެ ޔޫތު ވިންގްގެ ނައިބު ރައީސް މައިމޫންގެ ބަންދަށް ކްރިމިނަލް ކޯޓުން މިއަދު ފަސް ދުވަސް ޖަހައިފިއެވެ. އާންމު ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި ފުލުހުން ކުރަމުންދާ މަސައްކަތްތަކަށް ހުރަސްއަޅައި، ގާނޫނާ ހިލާފު އަމަލުތަކެއް ހިންގި ކަމުގެ ތުހުމަތުތަކެއް އޭނާގެ މައްޗަށް ފުލުހުން ކުރެއެވެ.

މީޑިއާއަށް ދެއްވި މަޢުލޫމާތުގައި ފުލުހުން ވިދާޅުވީ، މައިމޫން ހައްޔަރުކޮށްފައި ވަނީ މިދިޔަ ހުކުރު ދުވަހު އިދިކޮޅު ފަރާތްތަކުން މާލޭގައި ބޭއްވި މުޒާހަރާގެ ތެރެއިން އާންމު މަސްލަހަތު ނަގާލުމަށް ބޮޑެތި ހަމަނުޖެހުންތަކެއް ހިންގި މައްސަލައިގައެވެ. އެގޮތުން، އާންމު ދަތުރުފަތުރަށާއި ހިނގާބިނގާވެ އުޅޭ މީހުންނަށް އުނދަގޫވާ ގޮތަށް މަގުތައް ބަންދުކުރުމުގެ އިތުރުން، ސަލާމަތީ ކަންކަން ބެލެހެއްޓުމަށްޓަކައި ފުލުހުން ޖަހާފައި ހުރި ސަލާމަތީ ބެރިކޭޓުތައް ފަޅާލައި، ފުލުހުންގެ ސަފުތައް ރޫޅާލުމަށް އޭނާ ވަނީ ގަސްތުގައި މަސައްކަތް ކޮށްފައެވެ.

ކޯޓު އަމުރެއްގެ ދަށުން ރޭގެ ވަގުތެއްގައި މައިމޫން ހައްޔަރުކުރI، އޭނާ ހިންގި މި ނުރައްކާތެރި އަމަލުތަކަށް ފަހުވެސް ރޭ މާލޭގައި ބޭއްވި މުޒާހަރާގައި ބައިވެރިވެ، އަނެއްކާވެސް މަގުމަތީގެ މަސްލަހަތު ނަގާލަން އުޅެނިކޮށެވެ.

މާލޭގެ އަމަންއަމާންކަން ގެއްލުވާލައި ފުލުހުންގެ ގާނޫނީ ވާޖިބަށް ހުރަސްއަޅާ ފަރާތްތަކާމެދު ގާނޫނީ ފިޔަވަޅު އެޅުމަށް ސަރުކާރުގެ ކަމާބެހޭ މުއައްސަސާތަކުން ދަނީ ހަރުދަނާ މަސައްކަތްތަކެއް ކުރަމުންނެވެ.