މިހާތަނަށް 2,000 އަށް ވުރެ ގިނަ މީހުން ހިލޭ މެޑިކަލް ޗެކަޕް ހަދައިފި

ކޮންމެ ދިވެއްސަކަށް އަހަރަކު ދެ ފަހަރު ހިލޭ މެޑިކަލް ޗެކަޕް ހަދަން ހުޅުވާލި ފުރުޞަތުގައި މިހާތަނަށް 2،000 އަށް ވުރެ ގިނަ މީހުން އެ ޚިދުމަތް ހޯދައިފިއެވެ.

ހެލްތު މިނިސްޓްރީން މިއަދު ބުނީ ކޮންމެ ދިވެހި ރައްޔިތަކަށް އަހަރަކު ދެ ފަހަރު ހިލޭ މެޑިކަޕް ޗެކަޕް ހެދުމުގެ ފުރުޞަތު ލިބިދޭ، މެޑިކަލް ޗެކަޕް ޕްރޮގްރާމުގެ ތެރެއިން މިހާތަނަށް 2،180 މިީހުން ޗެކަޕް ހަދާފައިވާ ކަމަށެވެ.

ކޮންމެ ދިވެއްސަކަށް އާސަންދަ ސްކީމްގެ ދަށުން އަހަރަކު ދެ ފަހަރު މެޑިކަލް ޗެކަޕް ހެދުމުގެ މަގުފަހިކޮށްދިނުމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވައުދުފުޅެކެވެ. ރައީސްގެ ވައުދުފުޅާ އެއްގޮތަށް އެ ޕްރޮގްރާމް ފެށީ މިދިޔަ އަހަރު އެޕްރީލްގައެވެ.

އާސަންދަ ސްކީމުގެ ދަށުން އުމުރުން 19 އަހަރު މަތީގެ އެންމެނަށް އަހަރަކު ދެ ފަހަރު ސަރުކާރު ހޮސްޕިޓަލުތަކުން މެޑިކަޕް ޗެކަޕް ހިލޭ ހެދޭ އިންތިޒާމު ސަރުކާރުން ވަނީ ހަމަޖައްސައިދީފައެވެ. އަދި 18 އަހަރުން ދަށުގެ ކުދިންނަށް ސަރުކާރުގެ ހޮސްޕިޓަލްތައް މެދުވެރިކޮށް ސްކްރީނިން ހެދޭނެ އިންތިޒާމު ވެސް ވަނީ ހަމަޖައްސައިދީފައެވެ.