ޖަމިއްޔާތަކުގެ ރަޖިސްޓްރާ އަށް ހުށަހަޅަން ޖެހޭ ލިޔެކިޔުންތައް ގަވާއިދުން ހުށަހަޅާފައި ނުވުމުގެ ސަބަބުން ހުއްޓިފައިވާ ޖަމިއްޔާތައް އެކްޓިވް ކުރުމަށް ހުށަހަޅަން ޖެހޭ ލިޔެކިޔުންތައް ހުށަހެޅުމަށް އިތުރު ފުރުސަތެއް ދޭން ޔޫތު މިނިސްޓްރީން ނިންމައިފި އެވެ.
ޔޫތު މިނިސްޓްރީން ބުނީ އިތުރު ފުރުސަތު ދިނުމަށް ފުރަތަމަ ހަމަޖެހިފައި ވަނީ 1971 ވަނަ އަހަރުން ފެށިގެން 1991 ވަނަ އަހަރާއި ދެމެދުގައި ރަޖިސްޓްރީ ކުރެވި އިންއެކްޓިވް ވެފައިވާ 55 މަދަނީ ޖަމިއްޔާއަކަށް ކަމަށެވެ.
އިތުރު ފުރުސަތު ދެވޭ ފުރަތަމަ 55 މަދަނީ ޖަމިއްޔާގެ ލިސްޓު ވެސް ވަނީ އާންމުކޮށްފަ އެވެ.
Advertisement
ލިޔެކިޔުންތައް ހުށަހެޅުމަށް ހަ މަސްދުވަހުގެ މުއްދަތެއް، އަންނަ ޖުލައި މަހުގެ 20 ވަނަ ދުވަހުގެ ނިޔަލަށް ދޭން ވަނީ ނިންމައިފަ އެވެ.
މި މުއްދަތު ތެރޭގައި ޖަމިއްޔާ އެކްޓިވް ނުކުރާ ނަމަ، އެފަދަ ޖަމިއްޔާތައް އުވާލުމުގެ މަސައްކަތް ކުރިއަށް ގެންދާނެ ކަމަށް މިނިސްޓްރީން ބުންޏެވެ.
ޖަމިއްޔާ އެކްޓިވް ކުރުމަށް ލިޔެކިޔުން ފުރިހަމަކުރަން ބޭނުންވާ ޖަމިއްޔާތަކުން ލިޔުންތައް cso@youth.gov.mv އަށް އީމެއިލް ކުރުމަށް މިނިސްޓްރީން ވަނީ އެދިފަ އެވެ.
