ދުނިޔޭގެ ނަފްސާނީ ސިއްހަތުގެ ދުވަހާ ގުޅިގެން "ޝޭޑްސް އޮފް މައިންޑް" ގެ ނަމުގައި ބޭއްވުމަށް ހަމަޖެހިފައިވާ އާޓް އެގްޒިބިޝަން މިމަހުގެ 12 ވަނަ ދުވަހު ހުޅުވުމަށް ތައްޔާރުވެއްޖެއެވެ.
ޔޫތު މިނިސްޓްރީން ބުނީ، މި އެގްޒިބިޝަން ކުރިއަށްދާނީ ނެޝަނަލް އާޓް ގެލެރީގައި މިމަހުގެ 12 އިން 17ގެ ނިޔަލަށް ކަމަށެވެ. އެގްޒިބިޝަން ހުޅުވިފައި ހުންނަ ދުވަސްތަކުގައި އާޓް ގެލެރީއަށް ވަން ހިލޭ ކަމެއް ކަމަށް އެ މިނިސްޓްރީން ހާމަކުރިއެވެ.
"މި އެގްޒިބިޝަންގެ މައިގަނޑު މަޤްޞަދަކީ ފަންނުވެރިކަމުގެ ތެރެއިން ނަފްސާނީ ހޭލުންތެރިކަން އިތުރުކުރުމާއި، ނަފްސާނީ ދުޅަހެޔޮކަމުގެ މުހިންމުކަން އާންމުންނަށް ގެނެސްދިނުމެވެ," ޔޫތު މިނިސްޓްރީ ބުންޏެވެ.
Advertisement
މީގެ އިތުރުން، މި އެގްޒިބިޝަންގައި ބައިވެރިވާ ފަންނާނުންނަށް އެމީހުންގެ މަސައްކަތްތައް ވިއްކައިގެން އާމްދަނީ ހޯދުމުގެ ފުރުޞަތު ލިބިގެންދާނެ ކަމަށްވެސް އެ މިނިސްޓްރީން ފާހަގަކުރިއެވެ.
