މެކްސިކޯގައި ބޭއްވުމަށް ހަމަޖެހިފައިވާ މިސް ޔުނިވާސް މުބާރާތުގައި ދިވެއްސަކު ބައިވެރިވުމަކީ ދިވެހި ސަރުކާރުން ބަލައިގަންނަ ކަމެއް ނޫންކަމަށާއި، އެ އިވެންޓުގައި ބައިވެރިވެ ރާއްޖެ ތަމްސީލުކުރުމަށް ދިޔަ ފަރާތުން އެ ޢަމަލު ހުއްޓައިލުމަށް އެދި މިނިސްޓްރީ އޮފް ޔޫތް އެމްޕަވާރމެންޓް، އިންފޯމޭޝަން އެންޑް އާޓްސްއިން ބަޔާނެއް ނެރެފިއެވެ.
މިނިސްޓްރީގެ ބަޔާނުގައި ބުނެފައިވަނީ، ދިވެހިންގެ ދީނާއި އަޤީދާއާއި ސަޤާފަތާ ނުގުޅޭ ހަރަކާތްތަކާއި މުބާރާތްތަކުގައި ދިވެހީން ބައިވެރިވުމަކީ ދިވެހި ސަރުކާރުން ބަލައިގަންނަ ކަމެއް ނޫން ކަމަށެވެ. އަދި މިފަދަ ކަންކަމަކީ ދިވެހީން ޤަބޫލުކުރާ އާންމު އަޚްލާޤާއި މިންގަނޑުތަކާއި އުސޫލުތަކާވެސް ޚިލާފު ކަންކަން ކަމަށް ފާހަގަކޮށްފައިވެއެވެ.
"ރާއްޖެ ތަމްސީލު ކުރުމުގެ ނަމުގައި ދިވެއްސަކު އެފަދަ ހަރަކާތަކަށް ދިޔުން ދިވެހި ސަރުކާރުން ކުށްވެރި ކުރެއެވެ. އަދި އެ ހަރަކާތުގައި ބައިވެރިވުމަށް މަސައްކަތް ކުރަމުންދާ ފަރާތުން އެކަން ހުއްޓާލުމަށް ގޮވާލަމެވެ،" މިނިސްޓްރީގެ ބަޔާނުގައި ބުނެފައިވެއެވެ.
Advertisement
މީގެއިތުރުން، ސަރުކާރުން މިފަދަ ހަރަކާތްތަކުގައި ދިވެއްސަކު ބައިވެރިކުރުވާ ކަމަށް ދޭހަވާ ގޮތަށް މަޢުލޫމާތު ނުފެތުރުމަށާއި، މިފަދަ ކަންކަމުގައި ދިވެހީން ބައިވެރި ނުވުމަށް ރައްޔިތުންނަށް ގޮވާލާފައިވެއެވެ.
