އުނގޫފާރު އާބަން ސެންޓަރަކަށް ތަރައްޤީކުރުމަށް ގިނަ މަސައްކަތްތަކެއް ކުރިއަށް ގެންދާނެ: ރައީސް

ރ. އުނގޫފާރު އާބަން ސެންޓަރެއްގެ ގޮތުގައި ތަރައްޤީ ކުރުމަށްޓަކައި މި އަހަރާއި ދައުރުގެ ބާކީ އަހަރުތަކުގެ ތެރޭގައި ގިނަ މަސައްކަތްތަކެއް ކުރިއަށް ގެންދާނެކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރ. އުނގޫފާރުގެ ރައްޔިތުންނާއި ބައްދަލުކުރެއްވުމަށް ކުރިއަށް ގެންދިޔަ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، ރާއްޖޭގެ ތަރައްޤީގެ މާސްޓަރ ޕްލޭން ސަރުކާރުން ހަދަން ފަށާފައިވާއިރު، ދުރުރާސްތާއަށް ވިސްނައި ސަރަޙައްދީ ތަރައްޤީގެ ވިސްނުމުގެ އިތުރުން ދެމެހެއްޓެނިވި ތަރައްޤީގެ ވިސްނުމުގައި ރާއްޖޭގެ ތަރައްޤީގެ މަސައްކަތްތައް ކުރިއަށް ގެންދިއުމަށް ކަންތައްތަކެއް އިޢުލާން ކުރައްވާފައި ވާނެ ކަމަށެވެ.

ރައީސް އިތުރަށް ވިދާޅުވީ، ހުރިހާ ރައްޔިތުންގެ މެދުގައި ވެސް ހަމަހަމަކަން އޮންނަންވާނެ ކަމަށާއި، ކުދި ރަށްތަކާއި ބޮޑެތި ރަށްތަކުގެ ދެމެދު ތަފާތުކުރުމެއް ނެތި ޚިދުމަތްތައް ލިބެންޖެހޭނެ ކަމަށް ޤަބޫލުކުރައްވާ ކަމަށެވެ. އެހެންނަމަވެސް، ދެމެހެއްޓެނިވި ގޮތެއްގައި ދުރުރާސްތާއަށް ވިސްނާއިރު، ރާއްޖޭގެ ހުރިހާ ރައްޔިތުންނަށް އެންމެ މަތީ ފެންވަރެއްގައި ހުރިހާ ޚިދުމަތްތަކެއް ދެވޭނީ ރާއްޖެ އުފެދިފައި އޮންނަ ގޮތްވެސް ޤަބޫލުކޮށް، އެހެނިހެން އެފަދަ ޙަޤީޤަތްތައް ބަލައިގަނެގެން ކަމަށް ރައީސް ވިދާޅުވިއެވެ.

ރައީސް ވިދާޅުވީ، މި މަޤްޞަދު ޙާޞިލުކުރެވޭނީ ސަރަޙައްދީ ވިސްނުމުގައި ބައެއް ރަށްތައް ތަރައްޤީކޮށްގެން ކަމަށާއި، ބައެއް ރަށްތަކަކީ އެންމެ މަތީ ފެންވަރުގައި ޚިދުމަތްތައް ތަރައްޤީ ކުރަން ޖެހޭ ތަންތަން ކަމަށެވެ. މިގޮތުން، އެންމެ މަތީ ފެންވަރުގައި ޚިދުމަތްތައް ޤާއިމުކުރުމަށްޓަކައި 7 ރަށެއް އާބަން ސެންޓަރުތަކުގެ ގޮތުގައި ތަރައްޤީކުރުމަށް އިޢުލާންކުރައްވާފައިވާނެ ކަމަށް ވިދާޅުވިއެވެ.

އާބަން ސެންޓަރުގެ ގޮތުގައި ރާއްޖޭގައި ތަރައްޤީކުރާ 7 ރަށް:

1) ރ. އުނގޫފާރު

2) ބ. އޭދަފުށި

3) ޅ. ނައިފަރު

4) އދ. މަހިބަދޫ

5) ފ. ނިލަންދޫ

6) ދ. ކުޑަހުވަދޫ

7) ލ. ފޮނަދޫ

ރައީސް ވިދާޅުވީ، އާބަން ސެންޓަރެއް ތަރައްޤީ ކުރުމަކީ ބުރަ މަސައްކަތްތަކެއް ކަމަށެވެ. މުޅި ސަރުކާރު ގުޅިގެން، ކައުންސިލުތަކާއި ރައްޔިތުންގެ ޝާމިލުވުމާއެކު ކުރެވިގެންދާންޖެހޭ މަސައްކަތްތަކެއް ކަމަށްވެސް ރައީސް ވިދާޅުވިއެވެ.

މިހާރު މި މަސައްކަތްތައް ފަށާފައިވާއިރު، މި އަހަރާއި ކުރިއަށް އޮތް އަހަރުތަކުގެ ތެރޭގައި އުނގޫފާރުގައި ގިނަ މަސައްކަތްތަކެއް ކުރިއަށް ގެންދާނެކަން ވެސް ރައީސް ހާމަކުރެއްވިއެވެ. އަދި އެއްފަދަ މަސައްކަތްތަކެއް ދެން ހުރި އާބަން ސެންޓަރުތަކުގައި ވެސް ކުރިއަށް ގެންދާނެކަން ރައީސް ފާހަގަކުރެއްވިއެވެ.

ރައީސް ވިދާޅުވީ، މި އާބަން ސެންޓަރުތަކަކީ އުމްރާނީ ތަރައްޤީގެ ގޮތުންނާއި، ތަޢުލީމީ އަދި ޞިއްޙީ ދާއިރާގެ އިތުރުން އިޖްތިމާޢީ އަދި އިޤްތިޞާދީ ގޮތުންވެސް އެންމެ ފެންވަރު ރަނގަޅުކޮށް ކަންކަން ކުރެވިފައި ހުންނަންޖެހޭނެ ތަންތަން ކަމުގައެވެ. މިއީ ދެމެހެއްޓެނިވި ތަރައްޤީގެ ވިސްނުމުން ކުރިއަށް ގެންދިއުމަށް ކަނޑައެޅިފައިވާ މަސައްކަތްތަކެއް ކަމަށް ވެސް އެމަނިކުފާނު ވިދާޅުވިއެވެ.