އެމެރިކާގެ 47 ވަނަ ރައީސްކަމަށް ހޮވިވަޑައިގެންނެވި ޑޮނަލްޑް ޓްރަމްޕް ރައީސްކަމުގެ ހުވާ ކުރެއްވުމަށްފަހު، ގިނަ އަދަދެއްގެ  އައު ސިޔާސަތުތަކެއް އިޢުލާންކުރައްވައިފިއެވެ. މީގެ ތެރޭގައި ގަވާއިދާ ޚިލާފަށް އެމެރިކާގައި އުޅޭ މީހުންނާއި "ކުށްވެރިން" އަނބުރާ ފޮނުވާލުމުގެ ސިޔާސަތު ހިމެނެއެވެ.

ހުވާކުރެއްވުމަށްފަހު ދެއްކެވި ވާހަކަފުޅުގައި ރައީސް ޓްރަމްޕް ވިދާޅުވީ އެމެރިކާގެ "ރަންޒަމާން" ފެށުނީ ކަމަށާއި، ޤައުމު ތަރައްޤީގެ އާ ލަނޑުދަނޑިތަކެއް ޙާޞިލުކުރާނެ ކަމަށެވެ. އަދި އެމެރިކާގެ މަޞްލަޙަތު އަބަދުވެސް އިސްކުރާނެ ކަމަށާއި، ޤައުމީ މިނިވަންކަމަށް އިޙްތިރާމްކުރާނެ ކަމަށް ވެސް ވިދާޅުވިއެވެ.

ރައީސް ޓްރަމްޕް އިޢުލާންކުރެއްވި އާ ސިޔާސަތުތަކުގެ ތެރޭގައި ދެކުނު ބޯޑަރުގައި ޤައުމީ ކުއްލި ނުރައްކަލުގެ ޙާލަތު އިޢުލާންކުރުމާއި، އޯގަނައިޒްޑް ކްރައިމް ގްރޫޕްތައް ބޭރުގެ ޓެރަރިސްޓުންގެ ގޮތުގައި ކަނޑައެޅުން ހިމެނެއެވެ. މީގެ އިތުރުން، އިންފްލޭޝަން ކޮންޓްރޯލްކުރުމަށް ކެބިނެޓަށް އަންގަވާނެ ކަމަށާއި، "މެކްސިކޯގައި ދެމިތިބުން" ސިޔާސަތު އަލުން ތަންފީޛުކުރައްވާނެ ކަމަށް ވެސް ވިދާޅުވިއެވެ.

އިތުރު ބަދަލުތަކުގެ ތެރޭގައި ގަލްފް އޮފް މެކްސިކޯގެ ނަން ގަލްފް އޮފް އެމެރިކާ އަށް ބަދަލުކުރުމާއި ޕެނަމާ ކެނަލް އަނބުރާ ނެގުން، ޓެރިފް ނެގުމާއި ވިޔަފާރީގެ ނިޒާމު އިޞްލާޙުކުރުން، ޓެކްސް ކުޑަކުރުން އަދި ސަރުކާރުގެ ސެންސަރުކުރުން ހުއްޓާލުން ހިމެނެއެވެ.

ރައީސް ޓްރަމްޕް ވިދާޅުވީ މި ބަދަލުތަކާއެކު އެމެރިކާ ވެގެންދާނީ ކުރިއަށްވުރެ ވަރުގަދަ، ބޮޑު އަދި ކާމިޔާބު ޤައުމަކަށް ކަމަށެވެ. އަދި އެމެރިކާ އަނެއްކާވެސް ދުނިޔޭގައި އުފެއްދުންތެރިކަން އެންމެ މަތީ ޤައުމަށް ވެގެންދާނެ ކަމަށްވެސް ވިދާޅުވިއެވެ.

ނިންމާލަމުން ރައީސް ޓްރަމްޕް ފާހަގަކުރެއްވީ، އޭނާއަށް ކުރިމަތިވި ދަތިތަކަކީ އެމެރިކާގެ ތާރީޚުގައި އެއްވެސް ރައީސަކަށް ކުރިމަތިވެފައިނުވާ ފަދަ ދަތިތަކެއް ކަމަށެވެ