މިސަރުކާރުން ހިލޭ ބޯންމެރޯ ހަދައިދީ، ލޭއަޅާ ކުދިންނަށް ދެމެހެއްޓެނިވި ގޮތަކަށް ފަރުވާ ދެވޭނެ އިންތިޒާމެއް ހަމަޖައްސަވައި ދެއްވާނެ ކަމަށް ރައީސުލް ޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންނެވި ވަޢުދުފުޅާއި އެއްގޮތަށް، ސަރުކާރުން އެކުދިންގެ ޞިއްޙަތަށް ދެއްވާ އިސްކަމުގެ ތެރެއިން، ބޯންމެރޯ ޓްރާންސްޕްލާންޓް ހަދަންޖެހޭ ކުދިންނަށް އެހީތެރިވުމުގެ މަސައްކަތް ހަލުވިކަމާއެކު ކުރިއަށްދާކަން ހެލްތު މިނިސްޓްރީން ބުނެފިއެވެ.
ހެލްތު މިނިސްޓްރީގެ މީޑިއާ އޮފިޝަލަކު މިއަދު ވިދާޅުވި ގޮތުގައި، މި ވަގުތު ބޯންމެރޯ ޓްރާންސްޕްލާންޓް ހަދަން 22 ކުއްޖަކު ވެއިޓްލިސްޓްގައި ތިބިއިރު، މިދިޔަ އަހަރު 14 ކުދިން ރާއްޖެއިން ބޭރަށް ގޮސްފައިވެއެވެ. މީގެ ތެރެއިން ހަތް ކުއްޖަކު ޓްރާންސްޕްލާންޓް ނިންމާފައިވާއިރު، މި ވަގުތު ވެސް ހަތް ކުދިން ފަރުވާ ހޯދަމުންދެއެވެ.
ރައީސް މުޙައްމަދު މުއިއްޒުގެ ވަޢުދުފުޅުތަކުގެ ތެރޭގައި 14 އޮގަސްޓް 2023 ގައި ވިދާޅުވީ، ދެމެހެއްޓެނިވި ގޮތެއްގައި ތެލަސީމިއާ ކުދިންގެ ބޯންމެރޯ ހެދޭނެ އިންތިޒާމް ހަމަޖައްސަވައި ދެއްވާނެ ކަމަށެވެ.
Advertisement
މީގެ އިތުރުން، ޞިއްޙީ ދާއިރާ ހަރުދަނާކުރުމުގެ މަސައްކަތުގެ ދަށުން، މިފަދަ ބަލިތަކަށް ފަރުވާ ހޯދުމަށް ކުރަންޖެހޭ ހޭދަ ކުޑަކުރުމުގެ އިތުރުން، ތެލަސީމިއާ ކުދިންނަށްޓަކައި ޚައްޞަ ސަމާލުކަމެއް ދީގެން، ސަރުކާރުން ވަނީ ގިނަގުނަ މަސައްކަތްތަކެއް ކޮށްފައިކަން ވެސް ފާހަގަ ކުރެވެއެވެ. މިގޮތުން، ޒަކާތު ފަންޑުގެ ހަރަދުގައި ކޮންމެ އަހަރަކު 10 ކުއްޖެއްގެ ބޯންމެރޯ ހެދުމަށް އިސްލާމިކް މިނިސްޓްރީ އާއި ހެލްތު މިނިސްޓްރީން ވަނީ މިދިޔަ އަހަރުގެ ފެބްރުއަރީ މަހު އެއްބަސްވުމެއްގައި ސޮއިކޮށްފައެވެ.
ރައީސް ޑރ. މުޙައްމަދު މުޢިއްޒުގެ ވިސްނުންފުޅާއި އެއްގޮތަށް، މި އެއްބަސްވުމުގެ ދަށުން ބޯންމެރޯ ހަދަން ކޮންމެ ކުއްޖަކަށް އެއް މިލިއަން ރުފިޔާއާއި ހަމައަށް އެހީ ދޭގޮތަށް ވަނީ ހަމަޖެހިފައެވެ. މިއީ އެކުދިންގެ ޞިއްޙަތަށް ސަރުކާރުން ދެއްވާ އަހައްމިއްޔަތުކަމުގެ ހެއްކެކެވެ.
ހެލްތު މިނިސްޓްރީގެ އިސްވެރިޔާ އިތުރަށް ވިދާޅުވި ގޮތުގައި، މި އަހަރު އިތުރު 10 ކުދިން ބޯންމެރޯ ހެދުމަށް ބޭރަށް ފޮނުވުމަށް ވަނީ ހަމަޖެހިފައެވެ. މީގެ ތެރެއިން ފަސް ކުދިންގެ ބޯންމެރޯ ސްޕެޝަލިސްޓް ރިވިއު ހެދުމަށް ފަހު އެކަމާއި ގުޅިގެން ތައްޔާރީތައް ވަމުން އަންނަ ކަމަށް ވެސް އެ ބޭފުޅާ ވިދާޅުވިއެވެ.
ރައީސް މުޙައްމަދު މުޢިއްޒުގެ ސަރުކާރުން ޞިއްޙީ ދާއިރާއަށް ގެންނަމުންދާ ކުރިއެރުންތަކުގެ ސަބަބުން، ކުރިއާއި އަޅާބަލާއިރު މިހާރު ގިނަ ކުދިންނަށް ފަސޭހަކަމާއެކު ބޯންމެރޯ ޓްރާންސްޕްލާންޓް ހެދުމުގެ ފުރުޞަތު ލިބެމުންދާކަން ފާހަގަކުރެވެއެވެ.
