ދުނިޔޭގައި މިހާތަނަށް ރެކޯޑު ކުރެވިފައި ނުވާ އާ މަހެއް އަނެއްކާވެސް ރާއްޖޭގެ ކަނޑުން ފެނިއްޖެ އެވެ.
މޯލްޑިވްސް މެރިން ޖާނަލް އިން ބުނީ "ރަކި ބުރެކި"ގެ ނަން ދެވިފައިވާ މި މަސް ފެނިފައި ވަނީ ކަނޑުގެ އަޑިން، އަލި ފަނޑުވާ ހިސާބުން ކަމަށެވެ. އެއީ 100 މީޓަރާއި 125 މީޓަރާ ދެމެދުގެ ފުންމިނަކުން ކަމަށް އެ ޖާނަލް އިން ބުންޏެވެ.
މި ފުންމިނަކީ ވަރަށް ތަފާތު ދިރުންތަކެއް އުޅޭ ހިސާބެއްކަން މިފަދަ ހޯދުންތަކުން ސާބިތުކޮށްދޭ ކަމަށާއި މިއީ ބޭރުގެ ސައިންޓިސްޓުންނާއި ރާއްޖޭގެ މެރިން ރިސާޗު ސެންޓަރު ގުޅިގެން ކުރެވުނު ދިރާސާއަކުން ހޯދުނު މަހެއް ކަމަށް މެރިން ޖާނަލްގައި ބުންޏެވެ.
Advertisement
މި މަހަށް "ރަކި ބުރެކި" ކިޔުނީ މިއީ ޑައިވަރުން ފެންނައިރަށް ވަރަށް އަވަހަށް ފިލާ މަހަކަށް ވީމަ އެވެ. އެކަން މި މަސް ކުރަނީ ރަކި ކަމާއި ގުޅުވައިގެން ކަމަށް ބަލައި އެ ނަން ދެވުނީ އެވެ.
ރާއްޖޭގެ ކަނޑުފަޅުގެ ދިރާސާގެ ތެރެއިން ގިނަ ސަރަހައްދުތަކުން ރަކި ބުރެކި ރެކޯޑްކުރެވިފައިވެ އެވެ. އެއީ އއ. އަތޮޅުން ފެށިގެން ދ. އަތޮޅުގެ ސަރަހައްދުގައި ހިމެނޭ ފަރުތަކުންނެވެ. އަދި މިއީ ހަމައެކަނި ރާއްޖެއިން ފެނިފައިވާ މަހެކެވެ.
މެރިން ޖާނަލް އިން ބުނީ މި މަސް 2 ނުވަތަ 3 އިންޗިއަށް ބޮޑުވާ ކަމަށް ރިޕޯޓްކޮށްފައިވާ ކަމަށެވެ. އަދި ބުރެކީގެ ތަފާތު ވައްތަރުތަކެއް ރާއްޖެއިން ރެކޯޑްކުރެވިފައިވާއިރު، މިއީ ވަރަށް ކުލަތައް ރީތި މަހެއް ކަމަށް ވެސް މެރިން ޖާނަލްގައި ބުންޏެވެ.
މިދިޔަ ޑިސެމްބަރު މަހު ވެސް ރާއްޖެއިން މުޅިން އާ މަހެއް ފެނިފައިވެ އެވެ. ދުނިޔެއިން އަލަށް ރެކޯޑުކުރެވުނު އެ މަހަށް ދިން ނަމަކީ "ކްރޯމިސް އަބަދަށް" އެވެ.
