"މޯލްޑިވްސް ހެލްތު ރިސާޗް ބުލެޓިން ވޮލިއުމް 10" ހެލްތު މިނިސްޓްރީން މިއަދު އާންމުކޮށްފިއެވެ.
މިނިސްޓްރީން ބުނީ މިއީ ރާއްޖޭގައި ކޮށްފައިވާ ޞިއްޙީ ދިރާސާތަކުގެ ނަތީޖާތަކާއި ތަފާސްހިސާބު ހިމެނޭހެން އެ މިނިސްޓްރީގެ ފަރާތުން ކޮންމެ އަހަރަކު އާންމުކުރާ ބުލެޓިން އެއް ކަމަށެވެ.
މި ބުލެޓިން ޝާއިޢުކުރުމުގެ މައިގަނޑު މަޤްސަދަކީ ރާއްޖޭގައި ހަދާ ޞިއްޙީ ދާއިރާއާ ގުޅުންހުރި ދިރާސާތަކުން ހޯދާ މަޢުލޫމާތުތައް ފަސޭހަކަމާއިއެކު ފޯރުކޮށްދިނުމާއި ރާއްޖޭގައި ޞިއްޙީ ދިރާސާކުރުމުގެ ރޫހު އާލާކޮށް ދިރާސާ ކުރާ ފަރާތްތަކުގެ މަސައްކަތްތައް އަގުވަޒަންކުރުން ކަމަށް މިނިސްޓްރީން ބުންޏެވެ.
Advertisement
މިނިސްޓްރީން ބުނީ މިއަހަރު އާންމުކުރި ރިސާޗް ބުލެޓިންގައި ރާއްޖޭގައި ހަދާފައިވާ ޞިއްޙީ ދިރާސާތަކުގެ ހަތް އެބްސްޓްރެކްޓެއް ހިމަނާފައިވާ ކަމަށެވެ. އޭގެ ތެރޭގައި މައިންނާއި ކުޑަކުދިންގެ ޞިއްޙަތު، ގައިންގަޔަށް އަރާ ބަލިތައް ކޮންޓްރޯލްކުރުން، ނަފްސާނީ ޞިއްޙަތު، އަދި ތިމާވެށި ދެމެހެއްޓެނިވި ގޮތެއްގައި ބޭނުންކުރުމާއި އާންމު ޞިއްޙަތާ ގުޅުން ހުރި މަޢުލޫމާތު ހިމެނޭ ކަމަށް މިނިސްޓްރީން ބުންޏެވެ.
މީގެ އިތުރުން، ނެޝަނަލް ހެލްތު ރިސާޗް ކައުންސިލްއާއި ގުޅުން ހުރި މަޢުލޫމާތާއި ޞިއްޙީ ދިރާސާކުރުމުށް ހުއްދަ ދިނުމުގެ މަރުހަލާތަކާއި 2022-2025 އަށް ރާއްޖޭގައި ޞިއްޙީ ދިރާސާކުރުމަށް އެންމެ އިސްކަންދެވޭ ދާއިރާތައްވެސް އެ ބުލެޓިންގައި ހިމެނޭ ކަމަށް މިނިސްޓްރީން ބުންޏެވެ.
މިނިސްޓްރީން ބުނީ މި ބުލެޓިން އާންމުކުރުމަކީ ރާއްޖޭގައި ޞިއްޙީ ދިރާސާކުރުން އިތުރަށް ހަރުދަނާކޮށް، ޞިއްޙީ ދިރާސާކުރުމުށް މަގުފަހިވާފަދަ ވެއްޓެއް ޤާއިމްކުރުމަށްޓަކައި ކުރެވޭ މުހިންމު މަސައްކަތެއް ކަމަށެވެ.
