ސްޓެލްކޯގެ ޓްރާންސްފޯމަރަކަށް ގެއްލުން ދީ ވައްކަން ކުރަން އުޅުނު މީހާ އަތިލައިގަންނަން އުޅެނިކޮށް ސްޓެލްކޯގެ މުވައްޒަފަށް ދިން ޙަމަލާ އެ ކުންފުނީގެ މެނޭޖިންގ ޑިރެކްޓަރ ހުސެއިން ފަހުމީ ކުށްވެރިކޮށްފިއެވެ.

އެކްސްގައި ކުރެއްވި ޕޯސްޓެއްގައި ފަހުމީ ވިދާޅުވީ ސްޓެލްކޯގެ މުވައްޒަފަށް ދިން ޙަމަލާއަކީ ނުރައްކާތެރި ޙަމަލާއެއް ކަމަށާއި، ދާއިމީ ނުކުޅެދުންތެރިކަމަކުން އެ މުވައްޒަފު ސަލާމަތްވީ ހަމަ ކިރިޔާ ކަމަށެވެ.

"ބޮޑު ރެންޗަކުން ބޮލުގައި ޖަހާ، މިރޭ އަޅުގަނޑުމެންގެ މުވައްޒަފަކަށް ދިން ޙަމަލާއަކީ ދާއިމީ ނުކުޅެދުންތެރިކަން ނުވަތަ ބޮލަށް ލިބުނު އަނިޔާއާ ގުޅިގެން ފުރާނައަށް ނުރައްކާވެދާނެ ފަދަ ޙާލަތެއް ކުރިމަތިވެދާނެ ފަދަ ޙަމަލާއެއް." ފަހުމީ ވިދާޅުވިއެވެ.

ފަހުމީ ވިދާޅުވީ ސްޓެލްކޯގެ ހުރިހާ މުވައްޒަފުންނަށް ޔަޤީންކޮށް އަރުވަނީ، މިރޭ އެ މުވައްޒަފު ދެއްކި ހިތްވަރުގެ އަގު ވަޒަންކުރާނެ ކަމަށެވެ. އަދި ސްޓެލްކޯގެ ޓީމަށް ދިމާވާ ކޮންމެ ނުރައްކަލެއް ވަރަށް ސީރިއަސްކަމާއެކު ބަލާނެ ކަމަށް ފަހުމީ ވިދާޅުވިއެވެ.

ފަހުމީ ވިދާޅުވީ ޓްރާންސްފޯމަރަށް ގެއްލުންދީ މާރާމާރީ ހިންގި މީހާ ފުލުހުންނާ ޙަވާލުކޮށްފައިވާ ކަމަށެވެ.