މޯލްޑިވް ގޭސްގެ ކުރީގެ މެނޭޖިންގ ޑިރެކްޓަރ އަބްދުﷲ މައުމޫން (ގޭސް މާނު) ގެ މައްޗަށް އުފުލާފައިވާ 7 ދަޢުވާއަށް ވެސް އޭނާ އިންކާރު ކޮށްފިއެވެ.
ކްރިމިނަލް ކޯޓުގައި މައުމޫނުގެ ދިފާއީ ވަކީލު ވިދާޅުވި ގޮތުގައި މި ދަޢުވާތަކަކީ މައުމޫނުގެ އަބުރު ކަތިލުމަށް އުފުލާފައިވާ ދަޢުވާތަކެއް ކަމަށާއި މިއީ އެއްވެސް އަސާސެއް ނެތް ދަޢުވާ ތަކެކެވެ.
މި މައްސަލަ އަކީ މޯލްޑިވް ގޭސްގެ އެމްޑީގެ މަޤާމުގައި އަބްދުﷲ މައުމޫން ހުރި ދުވަސްވަރު އެކުންފުންޏަށް ބޭނުންވާ ކައްކާ ގޭސް (އެލްޕީޖީ) ބޭރުގެ ކުންފުންޏަކުން ހޯދުމުގެ މުއާމަލާތުގެ ތެރޭގައި ރިޝްވަތުގެ ގޮތުގައި ޖުމްލަ 3,106,189.38 ނަގާފައިވާ ކަމަށް ބުނާ މައްސަލައެކެވެ. އަދި އެ ފައިސާ އޭނާއާ ގުޅުން އޮންނަކަމަށް ތުހުމަތު ކުރެވޭ އަދި އޭނާގެ އާއިލީ ބައެއް ފަރާތްތަކާއި ގުޅުން އޮންނަ ކަމަށް ތުހުމަތުކުރެވޭ ބައެއް ކުންފުނިތަކަށް ޖަމާކޮށްފައިވާ ކަމަށް އޭސީސީން ވަނީ މިގެ ކުރިން ބުނެފައެވެ.
ކްރިމިނަލް ކޯޓުގައި މާނުގެ ވަކީލު ވިދާޅުވީ އެތައް ބަޔަކު ގުޅިގެން މެނުވީ ނުކުރެވޭނެ ކަންކަމުގެ ތުހުމަތުތަކެއް އެކުލެވޭ މައްސަލަތަކުގައި މައުމޫމަށް އެކަނި މި ދަޢުވާ ކުރަނީ އޭނާގެ ސިޔާސީ ކެރިއަރ ދުއްވާލުމަށެވެ.
ވަކީލު އިތުރަށް ފާހަގަކުރެއްވި ގޮތުގައި ބައެއް ކުންފުނިތަކާއެކު ކުރެވުނު މުޢާމަލާތްތަކަކީ ޕްރޮކިއުމަންޓުގެ ތެރެއިން ކުރެވުނު މަސައްކަތްތަކެވެ. އެހެންކަމުން، މި މަރުޙަލާތަކުގައި ކުންފުނީގެ މެނޭޖިންގ ޑިރެކްޓަރުގެ ބައިވެރިވުމެއް ނޯންނާނެ ކަމަށާއި، މައުމޫނު އެއްވެސް މުވައްޒަފަކަށް ނުފޫޒެއް ފޯރުވާފައި ނުވާކަން މުވައްޒަފުންގެ ބަޔާނުން އެނގޭއިރު ވަކި މަސައްކަތެއް ވަކި ކުންފުންޏަކަށް ދިނުމަށް މައުމޫނު އެއްވެސް މަސައްކަތެއް ކޮށްފައި ނުވާނެ ކަމަށް ވެސް ވަކީލު ވިދާޅުވިއެވެ.
މައްސަލައިގެ ދަޢުވާތަކުގައި މައުމޫނުގެ އެކައުންޓަށް އަދި އޭނާއާ ގުޅުންހުރި އެކައުންޓުތަކަށް ފައިސާ ޖަމާކުރިކަމަށް ބުނާ ތުހުމަތުތަކަށްވެސް މައުމޫނުގެ ފަރާތުން އިންކާރުކޮށްފައިވެއެވެ.
މި އަޑުއެހުމުގައި ޤާޟީ އިސްމާޢީލް ޝަފީޢު ވަނީ ޝަރީޢަތުގެ ކުރީގެ ހުށަހެޅުންތަކާއި ދިފާޢީ ހެކި ހުށަހެޅުމަށް 26 ޖެނުއަރީގެ ނިޔަލަށް ފުރުޞަތު ދެއްވާފައެވެ.
