އެސްޓޯނިއާގެ ރައީސްގެ ދައުވަތަކަށް އެސްޓޯނިއާއަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގައި އެސްޓޯނިއާގެ ރައީސް ހިޒް އެކްސެލެންސީ ޑރ.އަލާރް ކަރިސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި ދިވެހި ސަރުކާރުގެ ވަފުދަށް މަރުޙަބާ ވިދާޅުވެއްޖެއެވެ.
މި ރަސްމިއްޔާތު އޮތީ މިއަދު މެންދުރުފަހު ކަދްރިއޯގްގައި ހުންނަ ރިޔާސީ ގަނޑުވަރުގައެވެ.
މި ހަރަކާތުގައި އެސްޓޯނިއާގެ އަސްކަރިއްޔާއިން ވަނީ ދެ ޤައުމުގެ ޤައުމީ ސަލާމް ވެސް ކުޅެފައެވެ. އެއަށްފަހު، ރައީސުލްޖުމްހޫރިއްޔާއާއި އެސްޓޯނިއާގެ ރައީސް ކާރިސް ވަނީ ގާޑް އޮފް އޮނަރ ބައްލަވާލައްވާފައެވެ.
Advertisement
މި ރަސްމިއްޔާތުގައި ރައީސުލްޖުމްހޫރިއްޔާއަށް އެސްޓޯނިއާގެ ޢިއްޒަތްތެރިން މަރުޙަބާ ވިދާޅުވެ ތަޢާރަފްކުރެއްވުމަށްފަހު، ދިވެހި ސަރުކާރުގެ ޢިއްޒަތްތެރިން އެސްޓޯނިއާގެ ރައީސް ކާރިސްއަށް ތަޢާރަފްކޮށްދެއްވިއެވެ. އެއަށްފަހު ރައީސުލްޖުމްހޫރިއްޔާ ވަނީ ހަނދާނީ ފޮޓޯއެއް ނަންގަވައި، ގަނޑުވަރުގައި މެހެމާނުންގެ ފޮތުގައި ސޮއިކުރައްވާފައެވެ.
ރައީސުލްޖުމްހޫރިއްޔާ އެސްޓޯނިއާއަށް ކުރައްވާ މި ދަތުރުފުޅުގައި ރާއްޖެއާއި އެސްޓޯނިއާއާ ދެމެދު ޑިޖިޓަލް ޓެކްނޮލޮޖީ، ސައިބަރ ސެކިއުރިޓީ، އީ-ގަވަރނަންސް، މޫސުމީ މައްސަލަތަކާއި ތަޢުލީމީ ދާއިރާއިން ދެޤައުމުގެ ދެމެދުގައި ގުޅުން ބަދަހިކުރުމާއި ޕާޓްނަރޝިޕްގެ ފުރުޞަތުތައް ހޯއްދަވައިދެއްވުމަށް ވަނީ ހަމަޖެހިފައެވެ.
